Pas thatësirave Afrika Lindore përfshihet edhe nga kolera

NAIROBI (AA) - Kolera është duke shqetësuar vendet e Afrikës Lindore të cilat në të njëjtën kohë janë të goditura edhe nga thatësirat dhe uria, thuhet në raportin e publikuar të martën nga Komiteti Ndërkombëtar i Shpëtimit (IRC), raporton Anadolu Agency (AA).

IRC shkruan se miliona fëmijë të rajonit rrezikojnë të vdesin nga sëmundjet që për burim kanë ujin, ndërsa me të prekur janë fëmijët e kequshqyer, sepse si të tillë ata janë më të ndishëm ndaj kolerës, për çka gjasat për të vdekur i kanë pesë herë më shumë se sa fëmijët e ushqyer normal.

Grupi ndërkombëtar humanitar tha se në bazë të shifrave, numri i personave të vdekur nga sëmundjet ngjitëse, siç është diarea akute dhe kolera, në Jemen, Sudanin e Jugut, Kenia, Somali dhe Etiopi është ngjitur në mbi 2100 prej fillimit të vitit 2017, ndërkohë që numri i sëmundjeve të denoncuara është 130 mijë.

Drejtori i Shëndetit Emergjent në IRC, Michelle Gayer, në një deklaratë të shkruar tha se fluksi i refugjatëve kishte krijuar gjithashtu një mjedis të përsosur për shumimin e sëmundjeve ujore.

"Refugjatët po dëbohen nga shtëpitë e tyre dhe në numër të madh mbërrijnë në vendbanime të përkohshme, që paraqet kushte perfekte për përhapjen e sëmundjes", tha ajo, për të shtuar se sëmundja mund të përhapet në nivele 'katastrofike' nëse nuk adresohet menjëherë.

Organizata e Kombeve të Bashkuara (OKB) thotë se që nga fillimi i vitit 2016, rajoni i Afrikës Lindore është goditur nga një thatësirë e cila ka bërë që mbi 11 milionë njerëz të përballen me urinë.

Tre milionë nga ata janë vetëm në Kenia.