Esra Tekin
03 Prill 2025•Përditësim: 03 Prill 2025
Presidentja e Komisionit Evropian (KE), Ursula von der Leyen ka deklaruar se tarifat reciproke të shpallura së fundmi nga presidenti amerikan, Donald Trump, ndaj kombeve në mbarë botën janë "goditje e madhe" për ekonominë botërore, transmeton Anadolu.
"Shpallja e tarifave universale në të gjithë botën nga presidenti Trump, përfshirë BE-në është një goditje e madhe për ekonominë botërore. Më vjen shumë keq për këtë zgjedhje", tha Von der Leyen.
Komentet e saj erdhën pasi Trump dje nënshkroi një urdhër ekzekutiv, duke përmbushur premtimin e tij prej kohësh për të vendosur tarifa reciproke ndaj shteteve në mbarë botën, një lëvizje që ka ulur ndjeshëm tregjet për muaj të tërë.
"Ekonomia globale do të vuajë masivisht. Pasiguria do të spiralizohet dhe do të shkaktojë rritjen e proteksionizmit të mëtejshëm. Pasojat do të jenë të tmerrshme për miliona njerëz në mbarë globin, po ashtu për vendet më të cenueshme, të cilat tani janë subjekt i disa prej tarifave më të larta të SHBA-së, e kundërta e asaj që duam të arrijmë", tha Von der Leyen.
Ajo shtoi se është dakord me presidentin Trump se "të tjerët po përfitojnë në mënyrë të padrejtë nga rregullat aktuale", por ka shprehur gatishmërinë e saj për të mbështetur çdo përpjekje për ta bërë sistemin botëror të tregtimit "të përshtatshëm për realitetet e ekonomisë globale".
"Por, unë po ashtu dua të jem e qartë, shtrirja e tarifave si mjetit juaj i parë dhe i fundit nuk do ta rregullojë atë. Kjo është arsyeja pse që në fillim ne gjithmonë kemi qenë të gatshëm për të negociuar me SHBA-në, për të hequr çdo pengesë të mbetur në tregtinë transatlantike", tha Von der Leyen.
"Në të njëjtën kohë, jemi të përgatitur të përgjigjemi. Tashmë jemi duke finalizuar një paketë të parë kundërmasash në përgjigje të tarifave për çelikun", shtoi ajo.
Ajo theksoi se BE-ja gjithmonë do të mbrojë interesat dhe vlerat e saj, si dhe shtoi se nuk është tepër vonë për të zgjidhur shqetësimet përmes dialogut dhe negociatave.
