Putin dhe Netanyahu zhvillojnë bisedë telefonike

MOSKË (AA) – Presidenti i Rusisë, Vladimir Putin dhe kryeministri i Izraelit, Benjamin Netanyahu zhvilluan një bisedë telefonike me ç'rast diskutuan mbi zhvillimet e fundit në Lindjen e Mesme, transmeton Anadolu Agency (AA).

Në një deklaratë nga Qendra për media e Kremlinit thuhet se në bisedën telefonike me iniciativë të palës izraelite, Netanyahu ka informuar presidentin rus lidhur me operacionet e kryera nga ushtria izraelite në kufirin me Libanin.

Gjatë bisedës Putin ka theksuar rëndësinë e vendimit numër 1701 të Këshilit të Sigurimit të Kombeve të Bashkuara (OKB). Ai ka thënë se gjatë operacioneve duhet të veprohet në mënyrë të koordinuar me Forcat e Përkohshme të OKB-së në Liban.

Në bisedë është diskutuar edhe për zhvillimet e fundit në Siri. Po ashtu duke u theksuar nevoja e bashkëpunimit ushtarak në mes të Rusisë dhe Izraelit, është vënë në dukje rëndësia e kontakteve në mes të grupeve të përbashkëta të punës në kuadër të Ministrive të Mbrojtjes të të dy shteteve.