Oliver Towfigh Nia
21 gusht 2026•Përditësim: 21 gusht 2026
Qindra ukrainas besohet se kanë dezertuar nga programet e trajnimit ushtarak në Gjermani që nga fillimi i luftës me Rusinë, thanë raportet e mediave të premten, transmeton Anadolu.
Që nga shkurti i vitit 2022, rreth 30.000 ushtarë ukrainas kanë kaluar disa javë trajnime ushtarake në Gjermani. Shumica dërrmuese e tyre kthehen më pas për të mbrojtur vendin e tyre në luftë kundër Rusisë. Megjithatë, disa zgjedhin të ikin.
Vetëm në shtetin lindor të Saksonisë-Anhalt, më shumë se 80 ushtarë ukrainas që po trajnohen në Gjermani për luftën në Ukrainë janë larguar nga terrenet e stërvitjes që nga viti 2022, sipas gazetës së përjavshme Die Zeit.
Në të gjithë Gjermaninë raportohet se ka disa qindra raste të tilla. Sipas ligjit të Ukrainës, këta burra konsiderohen dezertorë. Ata përballen me 12 vjet burg kur kthehen në vendlindje.
Shumë nga dezertorët në Ukrainë nuk u regjistruan në ushtri vullnetarisht; u rekrutuan me forcë. Sipas raportit, kur ata u dërguan në zonën e stërvitjes ushtarake Altengrabow në Saksoni-Anhalt për stërvitje, ata shfrytëzuan mundësinë për t'u arratisur.
Ndryshe nga më shumë se një milion ukrainas që kanë ikur në Gjermani, ushtarët ukrainas nuk mbulohen nga paragrafi 24 i Aktit të Rezidencës Gjermane. Kjo dispozitë i jep mbrojtje kujtdo që është "zhvendosur nga Ukraina". Megjithatë, ai nuk vlen për ushtarët që janë dërguar në Gjermani nga qeveria e tyre.
Fillimisht, erdhën ushtarë shumë të motivuar dhe me përvojë dhe mësuan se si të përdornin obuset dhe tanket në terrene të ndryshme stërvitore në të gjithë Gjermaninë.
Tani që Ukraina po përpiqet të gjejë vullnetarë për të luftuar kundër Rusisë, një numër në rritje i burrave të papërvojë që nuk janë të gatshëm të luftojnë po rekrutohen.
Rreth 1.3 milionë burra ukrainas thuhet se janë të përjashtuar nga shërbimi ushtarak – shumë sepse profesionet e tyre konsiderohen kritike për funksionimin e shtetit, duke përfshirë ata që punojnë në banka, agjenci qeveritare, politikë, kompani të mëdha mediatike dhe sektorin e IT.
Studentët, kandidatët për doktoraturë dhe baballarët me tre ose më shumë fëmijë janë gjithashtu midis atyre që përjashtohen, si dhe burrat më të rinj se 25-vjeç. Përveç kësaj, atletët, artistët dhe aktorët e shquar zakonisht kanë mundësinë e përjashtimit nga shërbimi ushtarak.
