Rusia: Ndihma ushtarake e BE-së për Ukrainën e bën atë palë në konflikt

Zëdhënësja e Ministrisë së Punëve të Jashtme të Rusisë, Maria Zakharova, ka deklaruar se trajnimi ushtarak i Bashkimit Evropian (BE) për forcat ukrainase, si dhe dërgesat e armëve në Kiev e bëjnë bllokun evropian palë në konflikt, raporton Anadolu Agency (AA).

Duke folur në një konferencë për media në Moskë, Zakharova kritikoi masën e fundit të BE-së për mbështetjen e asistencës ushtarake për Ukrainën.

"Pothuajse 107 milionë euro janë ndarë për këtë përpjekje. Ky hap së bashku me furnizimin me armë vdekjeprurëse për regjimin e Kievit, rrit me kompetencë përfshirjen e BE-së, duke e bërë atë, natyrisht, palë në konflikt", tha Zakharova.

Të hënën, Këshilli i BE-së ra dakord për të ngritur një mision të ndihmës ushtarake për të mbështetur më tej forcat e armatosura ukrainase.

Sipas shefit të politikës së jashtme të BE-së, Josep Borrell, misioni do të nisë punën e tij në muajin nëntor.

Zakharova po ashtu paralajmëroi se mbështetja ushtarake e NATO-s për Ukrainën e afron aleancën në "vijën e rrezikshme të një përplasje të drejtpërdrejtë ushtarake me Rusinë".

"Vendet e NATO-s, sikur konkurrojnë me njëri-tjetrin, vazhdojnë të pompojnë regjimin e Kievit me armë dhe municione, ta furnizojnë atë me inteligjencë, të trajnojnë ushtarë të regjimit të Kievit dhe t’i japin udhëzime për zhvillimin e armiqësive, duke u afruar kështu në vijën e rrezikshme të një përplasje të drejtpërdrejtë ushtarake me Rusinë", tha Zakharova.

Sipas saj, çdo muaj rreth 1 miliard dollarë armë perëndimore, të furnizuara në Ukrainë, dalin në tregjet e zeza.

"Qarkullimi mujor i kontrabandës së këtij tregu të zi tejkalon 1 miliard dollarë. Ngarkesat ushtarake të NATO-s, të destinuara për regjimin e Kievit, përfundojnë në duart e terroristëve, ekstremistëve dhe grupeve kriminale në Lindjen e Mesme, Afrikën Qendrore dhe Azinë Juglindore", theksoi ajo.