Rusia pretendon se ka goditur objektin ushtarak të Ukrainës në Kiev

Rusia tha sot se ka kryer sulm hakmarrës duke përdorur armë me precizitet të lartë dhe me rreze të gjatë, që kishin në shënjestër objektet e Byrosë së Projektimit "Luch", e cila është e përfshirë në prodhimin e raketave dhe mirëmbajtjen e sistemeve të mbrojtjes ajrore "Patriot" të furnizuara nga SHBA-ja, transmeton Anadolu.

Ministria ruse e Mbrojtjes tha se sulmi ishte në përgjigje të një sulmi të së mërkurës, në të cilin u përdorën gjashtë raketa taktike ATACMS të prodhimit amerikan dhe katër raketa lundruese "Storm Shadow" ndaj uzinës ruse "Kamensky" në rajonin e Rostovit.

"Objektivat e goditjes u arritën dhe të gjitha objektivat u goditën", tha ministria.

Më herët, mediat ruse dhe ukrainase raportuan për një shpërthim të madh në Kiev, pasuar nga katër më të vegjël. Shpërthimi fillestar iu atribuua sulmit të Rusisë ndërsa shpërthimet e mëvonshme ishin të lidhura me sistemet e mbrojtjes ajrore.