Rusia pretendon se ka marrë kontrollin e një vendbanimi në rajonin e Kharkivit në Ukrainë

Ministria e Mbrojtjes së Rusisë tha se forcat e saj kanë marrë kontrollin e një vendbanimi në rajonin verilindor të Kharkivit në Ukrainë, transmeton Anadolu.

Ministria tha në një deklaratë se ka marrë kontrollin e fshatit Vovchanski Khutory, i cili ndodhet rreth pesë kilometra larg kufirit Rusi-Ukrainë.

Fshati, i cili kishte një popullsi prej rreth 1.300 banorësh në regjistrimin e Ukrainës të vitit 2001, ndodhet pak në lindje të qytetit të Vovchansk, të cilin Rusia pretendon se e ka pushtuar në dhjetor.

Kievi ka mohuar pretendimin e Moskës.

Shtabi i Përgjithshëm i Ukrainës tha në një deklaratë të mëparshme sot se forcat ruse kishin tentuar të thyenin mbrojtjen ukrainase pranë tre vendbanimeve në frontin e Slobozhanskut Jugor, përfshirë Vovchansk-un.

Megjithatë, Ukraina ende nuk ka komentuar mbi pretendimin e fundit të Rusisë ndërsa verifikimi i pavarur është i vështirë për shkak të luftës në vazhdim.