Gökhan Ergöçün
30 shtator 2026•Përditësim: 30 shtator 2026
Kryeministri i shtetit gjerman të Rajnës Veriore-Vestfalisë, Hendrik Wust premtoi sot se do të ndërtojë mbi lidhjet e kahershme ekonomike me Turqinë dhe do të forcojë më tej bashkëpunimin, raporton Anadolu.
Wust i bëri deklaratat në Forumin e Biznesit Turqi-Rajna Veriore-Vestfalisë në Stamboll. Veprimtaria u organizua bashkërisht nga Këshilli për Marrëdhënie Ekonomike me Jashtë të Turqisë (DEIK) dhe agjencia gjermane e tregtisë NRW.Global Business.
“Për dekada me radhë, njerëzit, idetë dhe investimet kanë lëvizur në të dyja drejtimet. Veçanërisht tani, ndërsa pengesat në tregtinë ndërkombëtare po rriten dhe zinxhirët e furnizimit janë nën presion, lidhjet e besueshme janë më të vlefshme se kurrë. Synimi ynë është të ndërtojmë mbi këto lidhje të forta dhe të forcojmë edhe më tej bashkëpunimin tonë", tha Wust.
Ai tha se qeveria kishte rënë dakord për procedurë të përshpejtuar të vizave për biznesmenët turq, për të kapërcyer kohët e gjata të përpunimit që pengojnë bashkëpunimin e domosdoshëm ballë për ballë.
Wust mbështeti përpjekjet për modernizimin e Bashkimit Doganor Evropian, 30-vjeçar, dhe përditësimin e politikës industriale të BE-së për ta përshtatur me strukturën aktuale të zinxhirëve globalë të furnizimit. Ai e përshkroi ekonominë turke si pjesë të domosdoshme të zinxhirit evropian të vlerës.
Wust theksoi se Turqia dallohej si një prej aktorëve kryesorë në investimet e huaja direkte dhe renditej si partneri i tretë më i madh tregtar i landit. "Më shumë se një në tri kompani me pronësi turke në Gjermani janë të vendosura në Rajnës Veriore-Vestfalisë, gjithsej rreth 1.300 biznese", tha ai.
Wust theksoi tregun e madh turk të energjisë së erës në tokë dhe investimet në prodhimin dhe transmetimin e energjisë, duke thënë se çmimet dhe siguria e energjisë janë thelbësore për industrinë e rëndë dhe energji-intensive të Rajnës Veriore-Vestfalisë.
“Ne shohim se Turqia ka një prej tregjeve më të mëdha të energjisë së erës në tokë në Evropë”, tha ai.
Më tej Wust shtoi se memorandumet e reja të mirëkuptimit të nënshkruara në forum mund të krijojnë partneritete në të ardhmen dhe të forcojnë më tej lidhjet ekonomike dhe gjeopolitike.
