Spanja dënon vendimin e Izraelit për avancimin e vendbanimeve në Bregun Perëndimor të pushtuar

Ministria e Jashtme e Spanjës dënoi të premten vendimin e Izraelit për të avancuar me ndërtimin e vendbanimeve të reja në Bregun Perëndimor të pushtuar, në kuadër të projektit të vendbanimit E1, transmeton Anadolu.

“Qeveria spanjolle dënon fuqishëm vendimin e qeverisë izraelite për të shpallur tender për ndërtimin e më shumë se 1.200 banesave në zonën E1, i cili cenon vazhdimësinë territoriale të Palestinës dhe ndan Kudsin Lindor nga Bregu Perëndimor”, tha Ministria në një deklaratë.

Ministri i Jashtëm, Jose Manuel Albares shprehu gjithashtu dënimin e tij në platformën amerikane të rrjeteve sociale X, duke theksuar se vendbanimet janë në kundërshtim me të drejtën ndërkombëtare dhe paqen.

“Izraeli duhet ta tërheqë vendimin e tij dhe të përparojë në zbatimin e zgjidhjes me dy shtete", tha Albares.

Në deklaratë, Ministria i bëri gjithashtu thirrje komunitetit ndërkombëtar të përmbushë përgjegjësitë e tij për të promovuar zbatimin e zgjidhjes me dy shtete, të cilën e përshkroi si zgjidhjen e vetme “që do të mundësojë përparimin drejt një paqeje të drejtë dhe të qëndrueshme në rajon".

Grupet izraelite të të drejtave të njeriut Ir Amim, Bimkom dhe Peace Now thanë të martën se Izraeli kishte shkelur angazhimin e tij lidhur me projektin E1 duke shpallur tender për ndërtimin e 1.234 njësive të banimit pa njoftuar paraprakisht palët që kundërshtojnë planin.

Plani E1 mbulon rreth 12 kilometra katrorë në lindje të Kudsit dhe synon të lidhë vendbanimin e paligjshëm izraelit Maale Adumim me Kudsin përmes ndërtimit të banesave vetëm për hebrenj në tokat palestineze.