Berk Kutay Gökmen
24 gusht 2026•Përditësim: 24 gusht 2026
Presidenti i SHBA-së, Donald Trump, tha se Irani po "shembet plotësisht" mes armiqësive të vazhdueshme mes Washingtonit dhe Teheranit, transmeton Anadolu.
"IRANI PO SHEMBET PLOTËSISHT!!! Presidenti DJT", shkroi Trump në platformën e tij Truth Social pa dhënë detaje të mëtejshme, duke përsëritur deklaratat e tij të mëparshme lidhur me gjendjen ekonomike dhe ushtarake të Teheranit.
Të dielën, Sekretari i Thesarit, Scott Bessent, tha se SHBA-ja po hynte në një "D-Day ekonomik" kundër Iranit, pas asaj që ai e përshkroi si çmontim të kapaciteteve ushtarake dhe bërthamore të Republikës Islamike nga administrata Trump.
"Presidenti (Donald) Trump ka çmontuar kapacitetet ushtarake të Iranit, ka shkatërruar gati 100 për qind të fabrikave të tij ushtarake dhe ka varrosur programin e tij bërthamor", tha Bessent në një postim në platformën amerikane të mediave sociale X.
Trump tha të premten se ende beson se Irani nuk ishte i gatshëm të bënte "marrëveshjen e duhur" me Washingtonin, ndërsa ndaj Teheranit janë vendosur masa ekonomike më të ashpra.
"Ata do të donin të bënin një marrëveshje, por nuk janë gati të bëjnë marrëveshjen e duhur, sipas mendimit tim", u tha Trump gazetarëve.
"Ata nuk kanë para, nuk kanë marinë, nuk kanë forca ajrore, nuk po i paguajnë ushtarët e tyre, nuk po paguajnë policinë e tyre. Ata kanë 350 për qind inflacion", shtoi ai.
Trump gjithashtu sugjeroi se SHBA-ja mban "kontroll të plotë" të rajonit që rrethon Ngushticën e Hormuzit, përfshirë rrugën ujore strategjike dhe zonën tokësore përreth saj në jug të Iranit.
Washingtoni dhe Teherani nënshkruan një memorandum mirëkuptimi në qershor, që parashikonte ndërprerjen e armiqësive dhe rivendosjen e transportit detar përmes ngushticës. Megjithatë, marrëveshja më vonë dështoi për shkak të mosmarrëveshjeve lidhur me kushtet e zbatimit të saj dhe të ardhmen e lundrimit nëpër këtë rrugë ujore.
Konflikti filloi në fund të shkurtit me një sulm të SHBA-së dhe Izraelit ndaj Iranit. Teherani u përgjigj duke goditur objektiva në Izrael dhe baza ushtarake amerikane në rajon.
