Trump paralajmëron pezullimin e përkohshëm të imigracionit në SHBA

Presidenti i Shteteve të Bashkuara të Amerikës (SHBA), Donald Trump, paralajmëroi se për shkak të pandemisë COVID-19 do të vendosë ndalesë të përkohshme të imigracionit, transmeton Anadolu Agency (AA).

“Në kulmin e sulmit të armikut të padukshëm dhe nevojës për të mbrojtur vendet e punës së qytetarëve tanë amerikanë, do të nënshkruaj një urdhër për të pezulluar imigracionin në SHBA”, ka shkruar Trump në Twitter.

Trump nuk zbuloi asnjë kornizë kohore të pezullimit të paralajmëruar.

Presidenti amerikan Trump këtë vendim e njoftoi në kulmin e kritikave se administrata e tij nuk ka arritur në mënyrë adekuate të kundërshtojë përhapjen e koronavirusit në SHBA, si pasojë e të cilit jetën në vend kanë humbur më shumë se 42.000 persona.

Më herët, autoritetet e SHBA-së përkohësisht mbyllën kufijtë me Meksikën dhe Kanadanë, ndërsa nga mesi i muajit mars, Departamenti i Shtetit ndërpreu procesin e dhënies së vizave në thuajse të gjitha ambasadat amerikane në botë.