Turqia miraton marrëveshjen e bashkëpunimit në industrinë e mbrojtjes me Brazilin

Turqia ka miratuar marrëveshje bashkëpunimi për industrinë e mbrojtjes me Brazilin, sipas një vendimi presidencial të botuar sot në "Gazetën Zyrtare" të vendit, transmeton Anadolu.

Marrëveshja e nënshkruar më 25 mars 2022 u miratua së bashku me notat përkatëse diplomatike.

Marrëveshja synon të forcojë bashkëpunimin midis dy vendeve duke zhvilluar aftësitë e tyre të industrisë së mbrojtjes përmes bashkëpunimit në zhvillimin, prodhimin, prokurimin dhe mirëmbajtjen e mallrave dhe shërbimeve të mbrojtjes.

Ajo gjithashtu mbulon aktivitetet përkatëse të mbështetjes teknike dhe logjistike. Parlamenti turk miratoi marrëveshjen më 23 qershor, pas së cilës ajo iu dorëzua presidentit Recep Tayyip Erdogan për miratim përfundimtar.

Brazili përfundoi më parë procesin e miratimit të brendshëm, duke e publikuar marrëveshjen në gazetën e tij zyrtare më 10 shtator 2025.

Marrëveshja pritet të sigurojë një kuadër ligjor për bashkëpunim më të thellë midis institucioneve publike të dy vendeve dhe kompanive të mbrojtjes, përfshirë projekte të mundshme të përbashkëta, prodhim, transferime teknologjie dhe prokurime reciproke.

Vendimi presidencial u nënshkrua të enjten dhe u botua në numrin e sotëm të "Gazetës Zyrtare".