Ushtria jemenase shënjestron pozicionet e Huthive në Taiz

Forcat qeveritare të Jemenit kanë goditur sot pozicionet, kazermat dhe pjesëtarët e Huthive në provincën Taiz të Jemenit perëndimor, njoftoi qendra mediatike e ushtrisë, transmeton Anadolu.

Qendra tha se forcat nga Rajoni i 4-t Ushtarak kryen sulmet në frontin Al-Kadha, në perëndim të Taizit. Në deklaratë nuk u dhanë menjëherë detaje për viktima apo dëmet e shkaktuara nga sulmet.

Grupi Huthi nuk e ka komentuar menjëherë raportimin. Në frontin Al-Kadha janë zhvilluar luftime të përsëritura ditët e fundit, ndërsa forcat qeveritare po përpiqen të sigurojnë rrugën që lidh Taizin me Mokhën.

Fronti Al-Kadha është strategjikisht i rëndësishëm, pasi lidh Taizin me qytetin port të Mokhës në Detin e Kuq, në perëndim të Jemenit.

Luftimet e fundit zhvillohen në një situatë më të gjerë përshkallëzimi mes qeverisë së Jemenit, të njohur ndërkombëtarisht dhe Huthive që nga fillimi i korrikut, pas disa vitesh qetësie relative që pas hyrjes në fuqi të armëpushimit të ndërmjetësuar nga OKB-ja në prill të vitit 2022.