Vriten 40 palestinezë në sulmet e reja izraelite në Gaza

Të paktën 40 palestinezë u vranë sot ndërsa forcat izraelite bombarduan zona të shumta në Rripin e Gazës, ndërsa viktima të tjera u raportuan në sulmet ndaj kampeve të zhvendosjes dhe lagjeve, transmeton Anadolu.

Agjencia palestineze e lajmeve Wafa raportoi se 16 trupa u sollën në spitalin Baptist Al-Ahli, 12 në spitalin "Nasser", tetë në Kompleksin Mjekësor Al-Shifa dhe dy në spitalin Al-Awda.

Ndërkohë, burime mjekësore i thanë Anadolu-t se shtatë palestinezë u vranë në bombardimet izraelite në Al-Mawasi të qytetit Khan Younis në Gazën jugore, ndërsa tre të tjerë u vranë kur automjeti i tyre u shënjestrua në të njëjtën zonë.

Në qytetin e Gazës, dy persona u vranë dhe disa të tjerë u plagosën në një sulm izraelit ndaj një grupi banorësh në lagjen Sabra ndërsa një person tjetër u vra në lagjen Ansar. Ekipet e shpëtimit nxorën dy trupa nga nën rrënojat e shkollës "Al-Falah" në lagjen Zeitoun, e cila ishte bombarduar pesë ditë më parë. Vetë shpëtimtarët u qëlluan gjatë operacionit të shpëtimit.

Në Rripin qendror të Gazës, pesë palestinezë të zhvendosur, kryesisht fëmijë, u vranë kur u goditën tendat që strehonin familjet në portin e Gazës. Një civil tjetër u vra dhe të tjerë u plagosën kur forcat izraelite bombarduan një tendë zhvendosjeje në Deir al-Balah.

Në një rast tjetër, një i sapolindur vdiq dhe tre foshnje të parakohshme u evakuuan sot nga spitali "Al-Hilu" në qytetin e Gazës në spitalet jugore në koordinim me Organizatën Botërore të Shëndetësisë, sipas një zyrtari lokal të shëndetësisë.

Evakuimi erdhi pasi forcat izraelite bombarduan spitalin "Al-Hilu" me dy predha tanku të dielën, duke ndërprerë aksesin për stafin dhe pacientët.

Drejtori i spitalit Al-Shifa, Mohammed Abu Salmiya tha se një nga katër foshnjat e parakohshme që prisnin transferimin kishte vdekur ndërsa 10 të tjerë mbeten në njësinë neonatale të spitalit.

Izraeli ka mbajtur një bllokadë në Gaza, shtëpi e gati 2.4 milionë njerëzve, për gati 18 vjet.

Që nga tetori i vitit 2023, bombardimet izraelite kanë vrarë gati 66.300 palestinezë, shumica prej tyre gra dhe fëmijë. OKB-ja dhe grupet e të drejtave të njeriut kanë paralajmëruar vazhdimisht se enklava po bëhet e pabanueshme, me urinë dhe sëmundjet që përhapen me shpejtësi.