Zelenskyy: Këtë vit duhet t‘i jepet fund agresionit rus

Presidenti i Ukrainës, Volodymyr Zelenskyy, tha se kanë nevojë për ndihmë me armë për t‘i dhënë fund këtë vit luftës kundër Rusisë që vazhdon në vendin e tij, transmeton Anadolu Agency (AA).

Në një deklaratë në faqen e internetit të Presidencës së Ukrainës, është ndarë një video-mesazh i Zelenskyy-t.

Në fjalën e tij Zelenskyy bëri të ditur se ka zhvilluar një bisedë telefonike me Presidentin e Francës, Emmanuel Macron dhe se Franca do të dërgojë në vendin e tij tanke me rrota.

Ai vuri në dukje rëndësinë e kësaj mbështetjeje me armë dhe tha se në luftën kundër Rusisë kanë nevojë për ndihma të tilla.

Duke tërhequr vëmendjen se ndihma me armë ndaj Ukrainës është e rëndësishme edhe për sigurinë e Evropës, Zelenskyy deklaroi: "Këtë vit duhet t‘i jepet fund agresionit rus dhe është e domosdoshme të mos vonohet asnjë prej mundësive të mbrojtjes që mund të përshpejtojnë humbjen e shtetit terrorist".

Rusia po përgatitet për valën e re të sulmeve kundrejt Ukrainës, pretendoi Zelenskyy, i cili shtoi se lidhur me çështjen ka informuar liderët e disa vendeve.

Zelenskyy theksoi se qëllimi i vërtetë i tyre është të çlirojnë të gjitha territoret e Ukrainës dhe që të sigurojnë sërish paqen në kohën më të shpejtë të mundshme në vendin e tij.

Duke mbrojtur idenë e tij se Rusia kishte planifikuar që të merrte nën kontroll plotësisht rajonin Donbas të Ukrainës deri në fund të vitit të kaluar, Zelenskyy më tej tha se forcat e armatosura të Ukrainës nuk lejuan përparimin e armikut në këtë rajon.

Zelenskyy u shpreh gjithashtu se ushtria ruse vazhdon të rrisë praninë e saj ushtarake në rajonin Donetsk.