"Nvidia" bëhet kompania e parë që arrin vlerën e tregut prej 5 trilionë dollarësh

Gjiganti amerikan i çipave "Nvidia" arriti një kapital tregu prej 5 trilionë dollarësh të mërkurën, duke e bërë atë kompaninë e parë publike në histori që arrin këtë moment historik, transmeton Anadolu.

Aksionet e prodhuesit të çipave u rritën me 5.1 për qind ndërsa kërkesa për teknologjitë e inteligjencës artificiale (IA) rritet.

"Nvidia", këtë korrik ishte gjithashtu kompania e parë në histori që arriti pragun e vlerës së tregut prej 4 trilionë dollarësh. Të nxitura nga bumi i IA-së, aksionet amerikane arritën nivele rekord për të dytën ditë radhazi të martën, me Apple dhe Microsoft që tejkaluan të dyja 4 trilionë dollarë në vlerë tregu.

Biznesi me seli në Kaliforni, i themeluar në vitin 1993, kaloi për herë të parë pragun prej 2 trilionë dollarësh në shkurt 2024 dhe më pas 3 trilionë dollarë këtë qershor.

Rritja më e fundit e çmimit vjen menjëherë pasi drejtori ekzekutiv i "Nvidia"-s, Jensen Huang tha se kompania pret të marrë 500 miliardë dollarë në porosi për çipa IA dhe zbuloi planet për të ndërtuar shtatë superkompjuterë të rinj për qeverinë amerikane.

Në një njoftim të martën, "Nvidia" tha se po blinte një aksion prej 1 miliard dollarësh në Nokia me qëllim krijimin e një aleance strategjike me kompaninë e rrjeteve për të zhvilluar teknologjinë celulare 6G.

"Nvidia" ka përfituar shumë nga kërkesa në rritje për procesorë dhe pajisje IA, veçanërisht pas zhvillimit të chatbot-eve IA si ChatGPT.