Tiranë, zhvillohet mbledhja e Këshillit të Investimeve

TIRANË (AA) – Është zhvilluar sot në Tiranë mbledhja e radhës e Këshillit të Investimeve, nën drejtimin e ministres shqiptare të Zhvillimit Ekonomik, Turizmit, Tregtisë dhe Sipërmarrjes, Milva Ekonomi, raporton Anadolu Agency (AA).

Tema e mbledhjes ishte "Për formalizmin dhe investimet në bujqësi: Skema e rimbursimit të TVSH-së dhe subvencionet".

“Ne temat e mbledhjes i kemi vendosur bashkërisht në mënyrë kolegjiale. Tema e sotme ka të bëjë me formalizmin e bujqësisë dhe funksionimin e skemës së kompensimit të TVSH-së (Tatimit mbi Vlerën e Shtuar) për nxitjen e investimeve. Gjatë takimit të sotëm diskutohet edhe për raportin e hartuar në lidhje me formalizimin e bujqësisë", u shpreh ministrja Ekonomi në fjalën e saj.

Ndërkohë pjesë e takimit ishin edhe ministra të kabinetit qeveritar, përfaqësues të shoqatave të biznezeit, ekspertë të ekonomisë, etj.

Këshilli i Investimeve është një projekt i iniciuar në shkurt të vitit 2014 me firmosjen e Memorandumit të Mirëkuptimit mes Qeverisë shqiptare dhe Bankës Europiane për Rindërtim dhe Zhvillim.

Qëllimi i Këshillit të Investimeve është mundësimi i një dialogu të drejtpërdrejtë dhe aktiv mes biznesit dhe qeverisë, parashtrimi i problematikave të lidhura me klimën e biznesit dhe investimeve, raportimi i rasteve të praktikave të padrejta dhe abuzive ndaj biznesit, lufta ndaj korrupsionit, evazionit dhe informalitetit, si dhe sugjerimin e mekanizmave ligjore dhe procedurialë për parandalimin, eliminimin dhe zgjidhjen e tyre.