Vazhdon protesta e emigrantëve ekonomik në kufirin greko-maqedonas

GJEVGJELI (AA) – Mëngjesin e sotëm në vendkalimin kufitar greko-maqedonas kanë vazhduar protestat e emigrantëve ekonomik, të cilët prej dy javësh qëndrojnë të bllokuar në “tokën e askujt” dhe nuk u lejohet hyrja në territorin e Maqedonisë, raporton Anadolu Agency (AA).

Turma e përbërë prej qindra emigrantëve ekonomik, përfshirë edhe fëmijë nga Bangladeshi, Pakistani dhe Maroku, me brohoritjet e tyre “Hapeni kufijtë”, “Nuk kthehemi prapa”, “Drejtësi për të gjithë”... kërkojnë tu jepet leje për të vazhduar udhëtimin e tyre të shpresës. Turma e emigrantëve në dorë mbanin edhe pankarta të ndryshme, si “Ne nuk jemi terroristë”, “Ne duam paqe”, “Çfarë krimi bëra unë”.

Ndërkohë, pas vendosjes së gardhit të telit, i cili ka bllokuar linjën e trenit ndërkombëtar që kalon nga Greqia nëpërmjet Maqedonisë për në vendet e Evropës Perëndimore, ushtria maqedonase mundohet që të ndërtojë një portë, e cila do të mundësojë të kalojë treni ndërkombëtar, ndërkohë rritet numri i forcave policore të Maqedonisë.

Nga ana tjetër, refugjatët nga Siria, Afganistani dhe Iraku kalojnë kufirin në mënyrë normale. Menjëherë pas procesit të regjistrimit ata me tren apo taksi vazhdojnë drejt kufirit verior të Maqedonisë. Momentalisht qendra për pritje të refugjatëve në Gjevgjeli është e zbrazur.