Kompania ruse e energjisë raporton përshkallëzim të sulmeve ndaj objekteve të TurkStream dhe Blue Stream këtë javë

Gazprom njoftoi se sulmet ndaj objekteve të saj që sigurojnë furnizimet për eksport përmes gazsjellësve TurkStream dhe Blue Stream janë përshkallëzuar nga 17 deri më 19 mars, transmeton Anadolu.

Kompania ruse e energjisë pretendoi se 22 dronë tentuan të godasin stacionin e pompimit Russkaya. Në të njëjtën kohë, tre dronë kishin në shënjestër stacionin Kazachya, ndërsa një tjetër tentoi të godasë stacionin Beregovaya.

"Përmes veprimeve të përbashkëta të Ministrisë ruse të Mbrojtjes dhe grupeve të lëvizshme operative, sulmet u zmbrapsën, duke parandaluar dëmtimin e objekteve të Gazprom-it", thuhet në deklaratën e publikuar në Telegram.

Zëdhënësi i Kremlinit, Dmitry Peskov, akuzoi Ukrainën për sulmet e tentativës, duke u thënë gazetarëve në Moskë se ushtria ruse po bën "gjithçka të mundur" për të zbutur kërcënimet, të cilat sipas tij rrezikojnë infrastrukturën kritike dhe rrugët ndërkombëtare të energjisë.

Peskov kritikoi përpjekjet për të sulmuar infrastrukturën energjetike si "të pamenduara dhe të papërgjegjshme", duke pasur parasysh kushtet "e ndjeshme" që aktualisht ndihen në tregjet botërore të energjisë.

Ai argumentoi se këto veprime janë "të afta të destabilizojnë situatën jo vetëm në rajon, por edhe në të gjithë botën".

Gazprom bëri një deklaratë të ngjashme më 11 mars, duke theksuar se gjatë dy javëve të fundit janë zmbrapsur 12 sulme ndaj objekteve të saj që sigurojnë furnizimet për eksport përmes TurkStream dhe Blue Stream.

Ukraina nuk ka komentuar mbi këto pretendime.