Shefi i Mbrojtjes: SHBA sot do të nisë "paketën më të madhe të sulmeve" deri më tani ndaj Iranit

Sekretari amerikan i Mbrojtjes, Pete Hegseth tha se vendi i tij do të nisë "paketën më të madhe të sulmeve deri më tani" ndaj Iranit, si pjesë e një operacioni në vazhdim që filloi muajin e kaluar, transmeton Anadolu.

"Deri më sot kemi goditur mbi 7.000 objektiva në të gjithë Iranin dhe infrastrukturën e tij ushtarake. Sot do të jetë paketa më e madhe e sulmeve deri më tani", tha Hegseth në një konferencë për media së bashku me gjeneralin Dan Caine, kryetar i Shefave të Shtabit të Përbashkët.

Hegseth tha se objektivi i SHBA-së mbetet "i pandryshuar", që është shkatërrimi i raketave, lëshuesve dhe bazës industriale të mbrojtjes së Iranit, si dhe flotës së tij detare. Ai refuzoi të përcaktojë një "afat të qartë" për përfundimin e operacionit kundër Iranit, duke shtuar se "jemi shumë në përputhje me planin".

SHBA-ja dhe Izraeli kanë vazhduar ofensivën e përbashkët ndaj Iranit që nga 28 shkurti, duke shkaktuar deri tani më shumë se 1.200 viktima, përfshirë edhe udhëheqësin suprem të atëhershëm Ali Khamenei.

Irani është kundërpërgjigjur me sulme me dronë dhe raketa ndaj Izraelit, Jordanisë, Irakut dhe vendeve të Gjirit që strehojnë asete ushtarake amerikane, duke shkaktuar viktima dhe dëme në infrastrukturë si dhe duke ndërprerë tregjet globale dhe aviacionin.