SHBA-ja përshëndet "progresin e mëtejshëm" në bisedimet Azerbajxhan-Armeni

Sekretari amerikan i Shtetit Antony Blinken përshëndeti "progresin e mëtejshëm" të arritur gjatë bisedimeve midis Azerbajxhanit dhe Armenisë në SHBA, por pranoi se "punë e vështirë" mbetet për t’u bërë për të arritur një marrëveshje përfundimtare, raporton Anadolu.

Duke folur në seancën plenare përmbyllëse të bisedimeve treditore të paqes në Qendrën Kombëtare të Trajnimit të Punëve të Jashtme George P. Shultz në Arlington të Virginia-s, Blinken shprehu vlerësimin e tij për "punën e rëndësishme dhe të vështirë" që ka qenë e vazhdueshme në përpjekjet për të arritur një marrëveshje paqeje të qëndrueshme midis Armenisë dhe Azerbajxhanit.

"Unë e vlerësoj përparimin e mëtejshëm drejt këtij objektivi të përbashkët të një marrëveshjeje, si dhe thellimin e të kuptuarit të pozicioneve për çështje të tjera të pazgjidhura, si dhe pranimin se mbetet punë e vështirë për t’u bërë në përpjekje për të arritur një marrëveshje finale", tha Blinken.

Raundi i dytë i bisedimeve të paqes të ndërmjetësuara nga SHBA-ja filloi të martën, ndërsa Blinken që u angazhua në takime dypalëshe dhe trepalëshe me homologun e tij nga Azerbajxhani dhe atë nga Armenia, respektivisht Jeyhun Bayramov dhe Ararat Mirzoyan.

Gjatë këtyre takimeve, ai theksoi rëndësinë e arritjes së një "marrëveshjeje të qëndrueshme dhe dinjitoze". Bayramov dhe Mirzoyan takuan gjithashtu Këshilltarin e Sigurisë Kombëtare të SHBA-së, Jake Sullivan.

Menjëherë pas seancës përmbyllëse, ministritë e jashtme të dy vendeve lëshuan një deklaratë të përbashkët, duke thënë se "kanë arritur një marrëveshje për nene shtesë dhe mirëkuptim të ndërsjellë për projektmarrëveshjen, ndërkohë që pranuan se qëndrimet për disa çështje kyç kërkojnë punë të mëtejshme".

"Të dy ministrat shprehën vlerësimin e tyre për palën amerikane për organizimin e negociatave midis Azerbajxhanit dhe Armenisë dhe përkushtimin e tyre për të vazhduar negociatat", shtohet në deklaratë.

"Progres i prekshëm"

Bayramov dhe Mirzoyan morën pjesë në bisedime pesëditore të paqes në Qendrën e Trajnimit të Punëve të Jashtme George P. Shultz muajin e kaluar, pas së cilave Blinken përgëzoi palët për "përparimin e prekshëm".

Marrëdhëniet midis dy ish-republikave sovjetike kanë qenë të tensionuara që nga viti 1991, kur ushtria armene pushtoi Karabakun, i cili njihet ndërkombëtarisht si pjesë e Azerbajxhanit, dhe shtatë rajone të afërta.

Pjesa më e madhe e territorit u çlirua nga Baku gjatë një lufte në vjeshtën e vitit 2020, e cila përfundoi pas një marrëveshje paqeje të ndërmjetësuar nga Rusia dhe hapi derën e normalizimit.

Megjithatë, vendosja e një pike kontrolli në kufirin midis Azerbajxhanit dhe Armenisë në rajonin e Kaukazit Jugor muaj më parë ndezi tensione.

Ministria e Jashtme e Azerbajxhanit ka thënë se pika kufitare u krijua si përgjigje ndaj kërcënimeve të sigurisë nga Armenia, duke përmendur transferimin e armëve dhe municioneve në rajonin e Karabakut. Jerevani i mohoi akuzat.

Washingtoni ka thënë më parë se ishte "thellësisht i shqetësuar" nga vendosja e pikës në korridorin e Laçinit.