Spanja: Libani "patjetër të përfshihet" në armëpushimin SHBA-Iran

Ministri i Jashtëm i Spanjës riafirmoi mbështetjen e Madridit për sovranitetin e Libanit, duke theksuar se vendi “duhet patjetër të përfshihet” në armëpushimin e arritur midis SHBA-së dhe Iranit, transmeton Anadolu.

“Libani duhet patjetër të përfshihet në armëpushimin e arritur sot në Lindjen e Mesme”, shkroi Jose Manuel Albares në rrjetin social amerikan X pas një bisede telefonike me homologun e tij libanez, Youssef Raggi.

Gjatë bisedës, ai ka riafirmuar mbështetjen e Spanjës për sovranitetin e Libanit dhe refuzimin e sulmeve nga Hezbollahu dhe Izraeli. Albares gjithashtu shprehu mbështetjen e Spanjës për Forcën e Përkohshme të OKB-së në Liban (UNIFIL).

Presidenti i SHBA-së, Donald Trump ka shpallur një armëpushim dyjavor me Iranin, duke thënë se Teherani ka paraqitur një propozim “të punueshëm” me 10 pika për negociata.

Këshilli i Lartë i Sigurisë Kombëtare i Iranit tha se propozimi me dhjetë pika, i dorëzuar SHBA-së përmes ndërmjetësimit pakistanez, përfshin një angazhim kyç amerikan për mosagresion, vazhdim të kontrollit iranian mbi Ngushticën e Hormuzit, pranim të pasurimit të uraniumit dhe heqje të të gjitha sanksioneve kryesore dhe dytësore.

Propozimi gjithashtu përfshin kompensimin për Iranin, tërheqjen e forcave luftarake amerikane nga rajoni dhe përfundimin e luftës në të gjitha frontet, përfshirë edhe luftën kundër Hezbollahut në Liban.