Thaçi priti ambasadoren zvicerane, flasin për thellimin e bashkëpunimit ekonomik

PRISHTINË (AA) - Presidenti i Republikës së Kosovës, Hashim Thaçi, ka pritur sot ambasadoren e Zvicrës në Kosovë, Krystyna Marty Lang, me të cilën bisedoi për bashkëpunimin mes dy shteteve, transmeton Anadolu Agency (AA).

Kabineti i presidentit informon se Thaçi ka falënderuar ambasadoren Lang për marrëdhëniet e mira mes dy vendeve.

“Ju falënderoj që për vite të tëra vazhdoni të jeni partner i rëndësishëm i Kosovës. Kemi bashkëpunim të shkëlqyer dypalësh”, u shpreh presidenti Thaçi.

Për diasporën e madhe kosovare që jeton në Zvicër, presidenti Thaçi tha se “ajo është një urë lidhëse mes dy vendeve dhe popujve”.

Ambasadorja e shtetit helvetik në Kosovë, Krystyna Marty Lang, e ka uruar presidentin Thaçi për detyrën e të parit të vendit, duke shtuar se Zvicra mbetet partnere e Kosovës.

Thaçi dhe Lang thuhet në njoftim kanë folur edhe për nevojën e thellimit të bashkëpunimit në mes dy shteteve, për çka Thaçi theksoi se duhen eksploruar mundësitë për forcimin e mëtejmë të këtij bashkëpunimi, veçanërisht në ekonomi.