Studiuesit kinezë prodhojnë "ngjitës të gjallë inteligjent" për trajtimin e sëmundjeve të zorrëve

Shkencëtarët kinezë kanë arritur të zhvillojnë një "ngjitës të gjallë inteligjent", i përbërë nga baktere të programuara që mund të lundrojnë në zorrë për të trajtuar sëmundjet e zorrëve, raportoi të martën agjencia shtetërore Xinhua, transmeton Anadolu.

Metoda ofron një qasje të re të synuar trajtimi për sëmundjen inflamatore të zorrëve (IBD), përmes përdorimit të një varianti të padëmshëm të modifikuar të E. coli, një lloj bakteri i zakonshëm i zorrëve.

Hulumtimi u publikua të hënën në revistën "Nature Biotechnology" nga një ekip kërkimor i Institutit të Teknologjive të Avancuara të Shenzhenit dhe Universitetit të Shenzhenit, të dyja në provincën Guangdong në jug të Kinës.

Shkencëtarët arritën të inxhinierojnë E. coli me një qark gjenetik që aktivizohet posaçërisht nga gjaku, një tregues kyç i shpërthimeve të rënda të IBD-së që përfshijnë dëmtime të mukozës dhe gjakderdhje.

Sapo aktivizohen, bakteret prodhojnë një proteinë ngjitëse për të formuar një "vulë" të qëndrueshme në vendin e gjakderdhjes dhe lëshojnë një agjent shërues për të riparuar shtresën e brendshme të zorrëve, thuhet në studim.

"Mikrobet e inxhinieruara kultivohen në lëng dhe administrohen nga goja. Pasi aktivizohen në zorrë, ato formojnë një morfologji të ngjashme me film që ngjitet në vende specifike të gjakderdhjes, ku ndihmojnë në ndalimin e gjakderdhjes dhe riparimin e dëmtimeve", tha Zhong Chao, autori përgjegjës i studimit.

Grupi planifikon ta çojë përpara "ngjitësin e gjallë" drejt studimeve klinike për të ofruar një terapi të re të synuar për pacientët me sëmundje të zorrëve.