STAMBOLL (AA) - İBRAHİM KILIÇ
Specialisti i kirurgjisë plastike, rekonstruktive dhe estetike, Op. Dr. Güncel Öztürk, thotë se shtetet e Evropës dhe Lindjes së Mesme parapëlqejnë Turqinë në fushën e kirurgjisë estetike.
Për Anadolu Agency (AA), Öztürk thekson se kirurgjia estetike në Turqi ka pozitë të avancuar në renditjen botërore. "Jemi në dhjetëshin e parë në renditjen botërore. Mjekët tanë bëjnë punë shumë të suksesshme në kirurgjinë estetike. Kjo gjë sjell kontribut në turizmin shëndetësor dhe rrjedhimisht, në ekonominë e vendit", shprehet Öztürk.
Öztürk thotë se në nivel botëror në turizmin shëndetësor ekziston një treg në vlerë prej afër 100 miliardë dollarësh, ndërsa duke folur për arsyet themelore mbi preferencat ndaj Turqisë për sa i përket kirurgjisë estetike, Öztürk thotë:
"Fakti që çmimet janë më të ulëta në krahasim me shtetet e tjera bën që Turqia të jetë atraktive. Domethënë, çmimet, mospritja në radhë, fakti që udhëtimi ndërkombëtar është bërë më i lehtë dhe më ekonomik dhe shërbimet shëndetësore me teknologji dhe standarde të larta mund të them se janë avantazhet e Turqisë".
Ndërkaq, duke i radhitur operacionet më të shpeshta në fushën e kirurgjisë estetike, Öztürk thekson se "Krahas operacioneve të rinoplastisë, gjoksit, liposuksionit dhe estetikës së kapakëve të syrit, në masë të madhe bëhet edhe mbjellja e flokëve".
Ai shton se në këtë mënyrë, shumë pacientë vijnë për operacione estetike nga shtetet e Evropës, si Gjermania, Franca, Belgjika, Holanda, Danimarka dhe Britania.
"Për Turqinë ka interesim të madh për mbjellje të flokëve
Öztürk më tej shprehet se ka shumë persona që vijnë në Turqi për mbjelljen e flokëve.
"Çmimet në Turqi janë më të ulëta krahasuar me shtetet e tjera. Mbjellja e flokëve në Evropë bëhet me çmim prej dhjetë mijë eurosh, kurse në SHBA kjo shifër arrin deri në 30 mijë dollarë. Ndërkaq, këto shifra janë shumë të volitshme në Turqi. Çmimet e volitshme bën që Turqia të jetë vend atraktiv. Turqia ka përparësi në këtë fushë. Pacientët vijnë jo vetëm nga shtetet e Evropës, por edhe nga shtetet arabe, veçanërisht nga Arabia Saudite, Emiratet e Bashkuara Arabe, Kuvajti, Iraku, Egjipti dhe Libani", thekson Öztürk.
Siç vë në dukje ai, gjatë operacioneve për mbjelljen e flokëve më së shumti përdoren metodat FUE Gold, DHI (Direct Hair Implant) dhe IceGraft.
"Ne më së shumti përdorim metodën DHI. Përmes kësaj metode, pacienti mund t'i kthehet jetës sociale më shpejtë. Pas disa ditësh ai mund të udhëtojë me avion ndërsa rezultatet janë më të mira. Natyrisht, rëndësi ka edhe trajnimi i personit që zbaton këtë metodë, talenti i tij dhe suksesi", shprehet Öztürk.
"Turqia në pesëshin e parë në fushën rinoplastisë
"
Öztürk tregon se pas mbjelljes së flokëve, rinoplastia është në krye të operacioneve që tërheqin interesimin më të madh. Ai thotë se Turqia kryeson në fushën e rinoplastisë.
"Mendoj se ndodhemi në pesëshin e parë. Edhe operacionet e estetikës së gjoksit, abdominoplastisë dhe kapakut të syrit radhiten lartë. Më pas vijnë operacionet e fytyrës, qafës dhe veshëve. Kirurgjia estetike, krahas trajtimeve të tjera mjekësore siç është kanceri, po ashtu intensifikon hyrjen e valutës së huaj në vend", tha Öztürk.
"Spitalet në Turqi në nivele me të avancuara sesa ato në Evropë dhe SHBA"
Në fund, duke iu drejtuar atyre që dëshirojnë të bëjnë operacione estetike, Öztürk thotë: "Mund të them se Turqia ka shënuar përparim fillimisht në fushën e shëndetësisë. Edhe mjekët tanë janë mjaft të trajnuar, të suksesshëm dhe të talentuar. Turqia kryeson me spitalet, e veçanërisht me spitalet e grupit A. Ato ndodhen në nivele më të larta sesa spitalet në shumë vende të Evropës dhe ato në SHBA. Edhe sektori i hotelerisë dhe transportit ka avancuar në masë të madhe. Për këtë arsye, ju mund të zbukuroheni në Turqi. Nëse doni që bukurisë t'i shtoni edhe më tepër bukuri, atëherë ju presim në Turqi".
Ndryshe, Po. Dr. Güncel Öztürk, i cili punon në fushën e kirurgjisë estetike prej rreth dhjetë vitesh, në të njëjtën kohë merr pjesë edhe në ekspozita kombëtare dhe ndërkombëtare me pikturat dhe skulpturat e tij.
"Arti i pikturës dhe skulpturës janë pjesë e profesionit tim, sepse nocionet e estetikës dhe plastikës janë nocione artistike. Këto janë integruar në profesionin tim. Kjo gjë, nga ana tjetër, më ngjallë emocione. Profesioni dhe aktivitetet e mia artistike plotësojnë njëra-tjetrën dhe janë në harmoni", thotë Öztürk.
