Dilara Hamit
24 Prill 2023•Përditësim: 24 Prill 2023
Ekspertët në Konferencën e 15-të të Sigurisë në Istanbul ranë dakord se zgjidhja e çështjes midis Türkiyes dhe Greqisë në Mesdheun Lindor duhet të arrihet me diskutime në përputhje me të drejtën ndërkombëtare, raporton Anadolu.
Temat e diskutuara në konferencën e mbajtur në Universitetin Başkent të Ankarasë përfshinin luftën Rusi-Ukrainë, mundësitë dhe sfidat në rajonin e Detit të Zi, mosmarrëveshjet për kufijtë detarë në Mesdheun Lindor, emigrimin e refugjatëve dhe fatkeqësitë.
Ish-ambasadori i SHBA-së në Türkiye, James Jeffrey, tha se ndihma e vendit të tij për Ukrainën krijoi shqetësim të madh në Washington dhe theksoi se SHBA-ja mund të mësojë nga pozicioni i Türkiyes.
Duke folur në një panel të konferencës, Jeffrey tha se është bërë jetike për të mbrojtur Ukrainën kundër Rusisë në përputhje me normat e Kombeve të Bashkuara (OKB) dhe NATO-s.
Duke theksuar se deri tani kanë arritur sukses relativ kundër Rusisë, Jeffrey paralajmëroi se nëse nuk mund të bëhet më shumë, do të dështojnë dhe Ukrainë mund të përballet me një kolaps.
Ekspertja për të drejtën ndërkombëtare në Universitetin Kombëtar dhe Kapodistrian të Athinës, Maria Gavouneli, diskutoi mosmarrëveshjet detare dhe konkurrencën gjeopolitike në Mesdheun Lindor.
Ajo theksoi se Mesdheu Lindor është një rajon i rëndësishëm dhe se Türkiye dhe Greqia duhet të ndërmarrin hapa për sigurinë në rajon.
Gavouneli tha se Türkiye dhe Greqia duhet të zhvillojnë formula që i japin përparësi sigurisë së Mesdheut Lindor, si dhe shtoi se shpreson që të dy vendet të takohen për të diskutuar çështje të tjera të diskutueshme, përfshirë mosmarrëveshjet e kufijve detarë.
Kreu i Institutit për të Drejtat Detare në Universitetin e Hamburgut, Alexander Proelss, tha se është e domosdoshme që problemet mes dy vendeve të zgjidhen me negociata sipas parimit të barazisë.
Duke theksuar se tensioni mes Türkiyes dhe Greqisë është bërë më kompleks në 10 vitet e fundit, Proelss tha se ky tension ka shkaktuar edhe probleme.
Proelss tha se ka disa rregulla dhe parime të së drejtës ndërkombëtare dhe se një formulë që duhet gjetur në përputhje me këto parime mund të zgjidhë problemin midis dy vendeve.
