Erdoğan dhe Macron diskutojnë luftën në Ukrainë dhe marrëdhëniet dypalëshe

Presidenti turk Recep Tayyip Erdoğan zhvilloi sot një telefonatë me homologun e tij francez Emmanuel Macron, me të cilin diskutoi luftën e Rusisë kundër Ukrainës, zhvillimet rajonale dhe lidhjet dypalëshe, transmeton Anadolu Agency (AA).

Sipas komunikatës së lëshuar nga Drejtoria e Komunikimeve e Presidencës së Turqisë, presidenti Erdoğan ka thënë gjatë telefonatës se marrëdhëniet Turqi-Francë janë “të një rëndësie të madhe”, duke shtuar se Ankaraja vazhdon përpjekjet e saj për t’i dhënë fund luftës Rusi-Ukrainë përmes diplomacisë.

Turqia si aleat i NATO-s gëzon lidhje të mira me Ukrainën dhe Rusinë dhe ka ofruar të jetë nikoqir i bisedimeve të paqes në nivel liderësh për një armëpushim të përhershëm. Bisedimet në nivel delegacioni, të cilat shënuan përparim domethënës, u mbajtën në Stamboll më 29 mars.

Erdoğan ka deklaruar se është e rëndësishme të mbështetet procesi i negociatave midis Kievit dhe Moskës.

Ai gjithashtu ka uruar Macron-in për rizgjedhjen e tij, i cili fitoi një mandat të dytë muajin e kaluar, duke dëshiruar që rezultati të jetë i dobishëm për Francën.