Beyza Binnur Dönmez
16 qershor 2021•Përditësim: 16 qershor 2021
Studimet fillestare kanë treguar se mukoza në Detin e Marmara të Turqisë "nuk është mbetje e rrezikshme dhe nuk tregon karekteristika toksike", deklaroi të martën ministri turk i Mjedisit dhe Urbanizimit, Murat Kurum, raporton Anadolu Agency (AA).
Duke folur pas një takimi të Bordit për Koordinimin e Planit të Veprimit për Detin Marmara, Kurum tha se nëse niveli i azotit i Detit Marmara ulet me 40 për qind, deti do të kthehet në normalitet.
Rritja e nivelit të oksigjenit në sipërfaqen dhe fundin e detit "është ndër synimet tona", shtoi ai.
Ministri theksoi se gjithsej 2.942 inspektime kanë për qëllim minimizimin e ndotjes në Detin Marmara në shtatë provinca dhe si rezultat, një fabrikë plehrash, një objekt termik dhe tre kantiere u mbyllën, ndërsa me një gjobë administrative prej 10 milionë lira (1,16 milion dollarë) u gjobitën 55 objekte dhe nëntë anije.
Kurum tha se shpreson që studimet shkencore rreth Detit Marmara të përfundojnë deri në fund të korrikut si dhe punohet që e gjithë zona e detit të shpallet zonë e mbrojtur.
Ai shtoi se një sistem i monitorimit të vazhdueshëm të ujërave të ndotura do të futet në të gjitha impiantet e trajtimit të ujërave të ndotura për të kontrolluar të gjitha burimet e ndotjes në det.
"Do të vendosim një sistem me mbeturina zero në të gjitha objektet në rajonin Marmara, pa ndonjë diskriminim të institucioneve publike dhe organizatave, bashkive tona dhe qytetarëve tanë", u zotua ai.
Javën e kaluar, autoritetet turke njoftuan një plan veprimi me 22 pika për pastrimin e mukozës, e cila ka mbuluar një pjesë të Detit Marmara në veriperëndim të vendit.
Mukoza, kryesisht e akumuluar në Mudanya, Gemlik Bay, Gebze dhe rrethinat e saj, zonat bregdetare të anës së Anadollit të Stambollit dhe rreth Ishujve të Princave, gjithashtu mbuluan pjesërisht brigjet e Detit Marmara.
Substanca që mbulonte bregdetin qendror të provincës veriperëndimore Yalova u shpërnda nga era në zonat bregdetare të rrethit Cinarcik dhe Armutlu si dhe në qytetin Esenkoy, të cilat janë qendra të rëndësishme turistike.
