"Heke Îsraîl dagirkeriya xwe biqedîne wê demê çareserî mimkun e"

NETEWEYÊN YEKBÛYÎ

Sekreterê Giştî yê Neteweyên Yekbûyî (NY) Antonio Guterres destnîşan kir ku heke Îsraîl dagirkeriya xwe biqedîne wê demê çareserkirina pirsgirêka di navbera Îsraîl-Filistinê da wê mimkun bibe.

Guterres ji bo foruma li NYê bi minasebeta salvegera 50emîn ya ji hêla Îsraîlê va dagirkirina axa Filistinê hat organîzekirin, peyam şand û pêşniyazên xwe yên çareseriyê yekoyek rêz kir.

Di peyama xwe da Guterres bi bîr xist ku Îsraîlê piştî şerê Ereb-Îsraîlê yê sala 1967an Şerîaya Rojava, Qudsa Rojhilat, Xeze û Golan dagirkir û ji ber vê jî bi sed hezaran filistînî û sûriyeyî ji cih û warê xwe bûn.

Sekreterê Giştî yê NYê Guterres destnîşan kir ku dagirkeriya Îsraîlê li ser şêniyên Filistînê tesîreke neyînî kir û nifşên nû yên ji Filistînê li kampên gelek qelebalix, di nav hêsîrî û feqîriyê da bê hay û hêvî mezin bûn.

Guterres di peyama xwe da ji herdu aliyan xwest ku bila mizakereyên xwe bidomînin û got ku dagirkeriya Îsraîlê ya ev 50 sal e didome bû sedema tundî û tolhildanê lê heke dawîlidagirkirinê bê wê demê çareserî jî mimkun e.