بەردەوامی سەرماوسۆڵە لە رۆژهەڵاتی ئانادۆڵو

ئەرزەڕۆم - AA

لە پارێزگاکانی ئەرزەڕۆم، قەرس، ئاگری و ئەردەخان رۆژهەڵاتی ئانادۆڵو، سەرماوسۆڵە بەردەوامە.

نزمترین پلەکانی گەرمای ناوچەکە لە شەودا بەم شێوەیە بوو لە ئەردەخان ١٠، ئاگری نۆ، قەرس و ئەرزەڕۆم شەش و لە ئیدر یەک پلە لەژێر سفرەوە بوو.

لە ئەرزەڕۆم بەهۆی سەرماوسۆڵەوە پلیکانە و رێگاکان بەستیان و چلوورە بە گوێسەبانەی ماڵەکاندا هاتەخوار.

هەروەها جامی ئۆتۆمبێلەکان و لقی درەختەکان بەهۆی سەرماوسۆڵەوە، زوقمیان گرت و حەوزی ئاوی سەر شەقامەکان و بەردەم مزگەوتەکان، بەستیان.

- ئاگری

لە پارێزگای ئاگری سەرماوسۆڵە و تەم، کاریگەری نەرێنیان لەسەر ژیانی هاووڵاتییان دروست کرد.

بەهۆی هەوای ساردەوە، بەشێکی رووبار و جۆگەکان بەستیان.

جامی خانوو و شوێنکارەکان زوقمیان گرت، هەروەها ماوەی دوو رۆژە تەم گرفتی بۆ هاتوچۆ لە پارێزگاکە دروست کردووە.

شۆفێران بەهۆی تەمەوە خێراییەکانیان کەم کردەوە و لەڕێی هەڵکردنی لایتی ئۆتۆمبێلەکانیانەوە هەوڵی بینینی بەردەم خۆیانیان دا.

- قەرس

لە پارێزگای قەرس بەهۆی سەرماوسۆڵەوە بەشێک لە رووباری قەرس بەستی و بەشێک لە کانیاو و جۆگەکانیش بە سەهۆڵ داپۆشران.

- ئەردەخان

سەرماوسۆڵە لە پارێزگای ئەردەخان بەردەوامە و بەهۆی سەرماشەوە رێگا و پلیکانەکان بەستیان.

هەروەها دەوروبەری رووباری کورا بە سەهۆڵ داپۆشرا و لە هەندێک ناوچەش تەم دروست بوو.

تیمەکانی شارەوانی لە ناوچە بەرزەکانی پارێزگاکە، بەردەوامن لە رادانی بەفر و کردنەوەی رێگاکان.