لێدوانی ئیبراھیم کاڵن لەبارەی بڕیاری ریفراندۆمی ھەرێمی کوردستان

گوتەبێژی سەرۆکایەتی کۆماری تورکیا، ئیبراھیم کاڵن لە کۆنگرەیەکی رۆژنامەوانیدا لەبارەی رۆژەڤی تورکیا وەڵامی پرسیاری رۆژنامەوانانی دایەوە.

گوتەبێژی سەرۆکایەتیی کۆماری تورکیا ئیبراھیم کاڵن دەربارەی ناکۆکی نێوان قەتەر و وڵاتانی کەنداو رایگەیاند کە وڵاتی سعوودیە خاوەن توانایەکی بەھێزە لە چارەسەرکردنی کێشەکان. لەمبارەوە گوتیشی: "دەمەوێت بڵێم لێرەدا سعوودیە پێگەیەکی زۆر تایبەتی ھەیە. سعوودیە ھەم وەک دەوڵەتی بیرمەند و ھەم وەک برا گەورەی ناوچەکە، خاوەنی گرنگترین توانا و لێھاتووییە بۆ چارەسەری ئەم قەیرانە".

ئیبراھیم کاڵن لەبارەی بڕیاری ریفراندۆمی سەربەخۆیی ھەرێمی کوردستانی عێراق گوتی: "لەگەڵ بەرپرسانی کوردی عێراق و بەغدادا کۆدەبینەوە. ئامانجی سەرەکیمان، گەڕاندنەوەیانە لەو ھەڵەیەی کە ھەیە لەرێی دیالۆگەوە. کارەکانمان لەو بارەیەوە بەردەوام دەبێت. دۆخێکی وەھا بوونی نییە، بێ ئەوەی دانیشین و قسە بکەین یەکسەر سزایان بدەین و دەروازە سنوورییەکان دابخەین".