36 وڵات داوا دەكەن لێپێچینەوە لەگەڵ بەرپرسیارانی تاوانی خاشقچیدا بكرێت

- لە 40ەمین كۆبوونەوەی ئەنجوومەنی مافی مرۆڤدا كە لە شاری جنێڤی سویسرا بەردەوامە، 36 وڵات كە 28 ئەندامی یەكێتیی ئەورووپای تێدایە، بەتوندترین شێوە ئیدانەی كوشتنی رۆژنامەنووسی سعوودی جەمال خاشقچیان كرد.

جنێڤ - AA

لە 40ەمین كۆبوونەوەی ئەنجوومەنی مافی مرۆڤدا كە لە شاری جنێڤی سویسرا بەردەوامە، 36 وڵات كە 28 ئەندامی یەكێتیی ئەوروپای تێدایە، بەتوندترین شێوە ئیدانەی كوشتنی رۆژنامەنووسی سعوودی جەمال خاشقچیان كرد و بانگەوازیان كرد لێپێچینەوە لەگەڵ بەرپرسیارانی تاوانەكەدا بكرێت.

نوێنەری هەمیشەیی ئایزلاندا لە ئۆفیسی جنێڤی نەتەوە یەكگرتووەكان هاراڵد ئاسپێڵوند، بەیاننامەی هاوبەشی 36 وڵاتی خوێندەوە و گوتی، "بەتوندترین شێوە ئیدانەی تاوانی كوشتنی رۆژنامەنووس جەمال خاشقچی دەكەین كە پشتڕاستكراوەتەوە لە كۆنسولخانەی سعوودیە لە ئیستانبوڵ كوژراوە".

ئاسپێڵوند گوتیشی، "پێویستە لێكۆڵینەوە لە تاوانەكە خێرا، كاریگەر، پڕ وردەكاری، سەربەخۆ، بێلایەن و شەفاف بێت. پێویستە لێپێچینەوە لە بەرپرسیارانی تاوانەكەش بكرێت".

ناوبراو بانگەوازیشیكرد لە سعوودیە، تەواوی بەڵگەكانی بەردەستی رابگەیەنێت.