ئێران.. گیانلەدەستدانی ١٩٥ کەسی دیکە بەهۆی کۆرۆنا

تاران – AA

لە ئێران لە میانی ٢٤ کاتژمێری رابردوودا، ١٩٥ کەس بەھۆی ڤایرۆسی کۆرۆنای نوێ (COVID-١٩) گیانیان لەدەستداوە، بەمەیش ژمارەی ئەو کەسانەی تا ئێستا بەھۆی ئەو پەتا جیھانگیرەوە گیانیان لەدەستداوە بەرزبووەتەوە بۆ ٢٨ ھەزار و ٢٩٣ کەس.

گوتەبێژی وەزارەتی تەندروستیی ئێران، سیما سادات لاری رایگەیاند کە لە میانی ٢٤ کاتژمێری رابردوودا، ١٩٥ کەس بەھۆی ڤایرۆسی کۆرۆنای نوێ گیانیان لەدەستداوە، ھەروەھا سێ ھەزار و ٨٧٥ حاڵەتی نوێی تووشبوون بەو پەتایە تۆمار کراون.

تا ئێستا ٢٨ ھەزار و ٢٩٣ کەس بەھۆی کۆرۆناوە گیانیان لەدەستداوە و ژمارەی تووشبووانیش گەیشتووەتە،‌ ٤٩٦ ھەزار و ٢٥٣ کەس.

ھەروەھا رەوشی تەندروستیی چوار ھەزار و ٤٣٩ کەس ناجێگیرە و ٤٠٣ ھەزار و ٩٥٠ کەسیش چاکبوونەتەوە و رەوانەی ماڵەوە کراونەتەوە.

سیما سادات لاری سەرنجیشی خستە سەر ئەوەی کە دامەزراوە تەندروستییەکانی وڵاتەکەی تا ئێستا، چوار ملیۆن و ٢٨٤ ھەزار و ٤١٣ پشکنینی کۆرۆنایان ئەنجامداوە.

گوتەبێژەکەی وەزارەتی تەندروستی ئێران ئەوەشی ئاشکرا کرد کە لە کۆی ٣١ پاریزگای وڵاتەکەی ٣٠یان لە لیستی سوور و مەترسیداردان.

بەھۆی زۆری ژمارەی حاڵەتەکانی کۆرۆنا لە پارێزگاکانی تاران، قوم، قەزوین و ئەلبورز دووبارە رێوشوێنەکان توندکراونەتەوە.

یەکەم حاڵەتی تووشبوون بە کۆرۆنا لە ئێران لە ١٩ی شوباتی رابردوو لە شاری قوم تۆمار کرا.