سووریا.. ٢٦٩ نەخۆشخانە کراوەتە ئامانج

جنێڤ - AA
لە وەتەی دەستپێکردنی شەڕی ناوخۆی سووریا تاکو ئێستا، ٢٦٩ نەخۆشخانە بە تەواوی یان بەشێکی رووخاوە و بەھۆیەوە ٧٥٧ کارمەندی تەندروستی کوژراون.
بەرپرسی تایبەتی کاروباری تەندروستی سەر بە نەتەوە یەکگرتووەکان داینیز پوراس کۆنگرەیەکی رۆژنامەوانی لە نووسینگەی نەتەوە یەکگرتووەکان لە جنێڤ ساز کرد و رایگەیاند ھێرشەکانی سەر نەخۆشخانە و بنکەکانی تەندروستی لە سووریا تاوانی جەنگە و لە چوارچێوەی تاوانی دژی مرۆڤایەتی ھەژمار دەکرێت.
پوراس ئاماژەی بەوە دا کە بەپێی راپۆرتی رێکخراوی پزیشکانی بەرگریکەر لە مافی مرۆڤ کە ناوەندەکەی لە نیۆیۆرکە، لە وەتەی دەستپێکردنی شەڕی ناوخۆی سووریا ٢٦٩ نەخۆشخانە لە سووریا بە تەواوی رووخاوە و یاخود زیانێکی زۆری پێگەیشتووە و راشیگەیاند لە ئەنجامی ھێرشەکانەوە سەدا ٦٠ نەخۆشخانەکانی سووریا بە تەواوی داخراوە یاخود تەنھا خزمەتگوزاری لە چەند بەشێک دەدات.
پوراس ئاشکراشی کرد کە ھەر بەھۆی ھێرشەکانەوە ٧٥٧ کارمەندی تەندروستی کوژراون.
ناوبراو بانگەوازی بۆ کۆمەڵگەی نێودەوڵەتی کرد کە ئەنجامدەرانی ئەو ھێرشانە دیاری بکەن و رادەستی دادگا بکەن و گوتیشی: "نەدانەوەی باج بەرامبەر ئەم پێشیلکارییە جددیانە لە دادگا، دابینکردنی ئاشتی ئەستەم دەکات".
یەکێک لە بەرپرسانی رێکخراوەکە بە ناوی ئەلیسە باکەر، ئاماژەی بەوە دا کە سەدا ٩٠ی ھێرشەکانی سەر نەخۆشخانەکانی سووریا لە لایەن رژێمی ئەسەد و رووسیاوە ئەنجام دراوە و راشیگەیاند زۆربەی ھێرشەکانی سەر بنکەکانی تەندروستی ناوچەکانی ئۆپۆزسیۆنی سووریا، بەھۆی ھێرشە ئاسمانییەکانی رژێمی ئەسەد و رووسیا لەکار کەوتووە.
باکەر روونیشی کردەوە کە بەھۆی گەمارۆکانی سەر شاری حەلەب و ھێرشەکانی رژێمی ئەسەد بۆ سەر رۆژھەڵاتی شارەکە، تاکە نەخۆشخانەی منداڵانیش رووخاوە . لەکاتێکدا ٨٥ ھەزار منداڵ لە حەلەب دەژین.
لە لایەکی ترەوە ھەماھەنگسازی رێکخراوی تەندروستی سووریا، عەبدولرەحمان ئالۆمار لە لێدوانێکی بۆ پەیامنێری ئاژانسی ئانادۆڵو، ئاشکرای کرد کە بەھۆی ھێرشەکانی سەر باشووری حەلەب، بارودۆخی خەڵکی شارەکەی خراپتر کردووە و گوتیشی: "ئیتر پێویستە شتێک بکرێت، چونکە خزمەتگوزاری تەندروستی بەرەو نەمان دەچێت. لە رۆژھەڵاتی حەلەب ٣٠٠ کەس دەژێت و تەنھا ٣٠ پزیشک خزمەتگوزاری پزیشکی پێشکەش دەکەن. پێش شەڕی سووریا، لە حەلەب ١٧ ھەزار پزیشک ھەبوون".