فڕۆکەکانی رووسیا نەخۆشخانەیەکیان لە سووریا بۆردومان کرد

فڕۆکە جەنگییەکانی رووسیا، نەخۆشخانەیەکیان لە شارۆچکەی سەراقیب سەربە پارێزگای ئیدلب باکووری رۆژئاوای سووریا، بۆردومان کرد.

لە لێدوانێکی بۆ ئاژانسی ئانادۆڵو، بەرپرسی بەرگری شارستانی لە ناوچەکە، حازم حەبیب گوتی: "فڕۆکە جەنگییەکانی رووسیا، نەخۆشخانەی شیفا-یان لە شارۆچکەی سەراقیب سەربە پارێزگای ئیدلب باکووری رۆژئاوای سووریا، بۆردومان کرد و بەهۆیەوە نەخۆشخانەکە تەواو وێران بووە".

ئەو بەرپرسە ئەوەیشی ئاشکرا کرد کەوا بەهۆی بۆردومانەکەوە هاووڵاتییەک بریندار بووە و گوتی: "رووسیا لە ناوچەکە تەنیا نەخۆشخانەکەی بۆردومان کرد، ئەو نەخۆشخانەیە خزمەتگوزاری تەندورستی پێشکەش بە هاووڵاتییانی شارۆچکەکە و گوندەکانی دەورووبەری دەکات. بەڵام بەهۆی بۆردومانەکەوە تەواو وێران بووە".

فڕۆکە جەنگییەکانی رووسیا لە ٣٠ ئەیلوولی ساڵی رابردووەوە تاوەکو ئێستا بۆردومانی ئەو ناوچانەی سووریا دەکەن کە لەژێر کۆنترۆڵی ئۆپۆزسیۆنی سووریا دایە و بەهۆیەوە ژمارەیەکی زۆر لە نەخۆشخانە، قوتابخانە و شوێنە گشتییەکانیان وێران کراون.