پۆمپیۆ: "ئەمریکا لەمەودوا یەکەکانی نیشتەجێبوونی جوولەکەکان بە نایاسایی نابینێت"

واشنتۆن - AA

وەزیری دەرەوەی ئەمریکا، مایک پۆمپیۆ رایگەیاند کە ئەوان لەمەودوا یەکەکانی نیشتەجێبوونی سەر بە جوولەکەکان لە کەناری رۆژئاوا بە نایاسایی نابینن.

مایک پۆمیۆ کۆنگرەیەکی رۆژامەوانی لە وەزارەتی دەرەوەی وڵاتەکەی رێکخست و لێدوانی لەمبارەیەوە دا.

پۆمپیۆ ئەوەی روونکردنەوە کە ئەوان وەک ئیدارەی دۆناڵد ترەمپ سیاسەتی پێشووی باراک ئۆبامایان لەبارەی یەکەکانی نیشتەجێبوونی سەر بە جوولەکەکان گۆڕیوە و ھەڵوێستی چەند ساڵەی ئەمریکا لە بەرامبەر پێشھاتەکانی کەناری رۆژئاوا سوودی بۆ دەستەبەرکردنی ئاشتی نەبووە.

وەزیری دەرەوەی ئەمریکا راشیگەیاند کە ئیدارەی ٣٩یەمین سەرۆکی ئەمریکا، جیمی کارتەر لە ساڵی ١٩٧٨ بەرگریی لەوە کردبوو کە یەکەکانی نیشتەجێبوونی جوولەکەکان یاسایی نییە، بەڵام ئیدارەی ٤٠ەمین سەرۆکی ئەمریکا، رۆناڵد ریگن دژی ئەمە وەستاوەتەوە.

پۆمپیۆ گوتی: "ئیدارەی ريگن باوەڕی بەوە نەبووە کە ئەم یەکە نیشتەجێبووانە نایاساین و ئاماژەی بەوەداوە کە ھەوڵەکانی ئیسرائیل لەبارەی یەکەی نیشتەجێی سڤیل یاساییە. لە دوای لێکۆڵینەوەی ورد لە لایەنەکان، ئێمە وەک ئیدارەی ترەمپ لەگەڵ سەرۆک ريگن ھاوڕاین و لەمەودوا یەکەکانی نیشتەجێبوونی سەر بە جوولەکەکان لە کەناری رۆژئاوا بە نایاسای نابینین".