"حکوومەتی عێراقی سێ مەرجی بۆ ھەرێم ھەیە"

سلێمانی ـ AA

جێگری دووەمی سەرۆکی پەرلەمانی عێراق، ئارام محەمەد لە لێدوانێکی رۆژنامەوانیدا و دوای بەشداری کردنی لە رێوڕەسمێکی سەنتەری میترۆ کە لە شاری سلێمانی بۆ بڵاوکردنەوەی راپۆرتی میترۆ لەسەر رەوشی رۆژنامەگەری لە ھەرێمی کوردستان رێکخرابوو، ئاماژەی کرد بەوەی "حکوومەتی عێراقی سێ خاڵی کردووەتە بنەما بۆ ئاساییکردنەوەی پەیوەندییەکانی نێوان ھەردوولا، کە بریتین لە نەوت و فڕۆکەخانە و سنوورەکان، ئەوەش لە گفتوگۆدا چارەسەر دەکرێت کە بە ھاوبەشی بەڕێوەببرێن یان بە چ شێوەیەکی تر بێت، چونکە ھەریەکەیان یاسای ھەیە و حکوومەتی ناوەندی بە ویستی خۆی ناتوانێت مەرجەکانی بسەپێنێت بەسەر ھەرێمدا".

ئارام محەمەد گوتی: "کاتێک حکوومەتی عێراق ئەو بڕە نەوتەی دیاری کراوە دەفرۆشێت، پشکی ھەرێمی کوردستان لە یاساکەدا دانراوە و دیاری کراوە، کاتێک ئەو خاڵانە جێبەجێ دەکرێن و حکوومەتی ھەرێمی کوردستان ئەو نەوتەی لەژێر دەستیدایە رادەستی بکات، ئەوکات حکوومەتی ناوەندی ناتوانێت ئەو بڕە پارەیەی کە پەیوەندی بە ھەرێمی کوردستانەوە ھەیە نەنێرێت".

جێگری سەرۆکی پەرلەمانی عێراق لە وەڵامی پرسیاری پەیامنێری ئاژانسی ئانادۆڵو لە بارەی پەیوەندی پرسی ھەڵبژاردنەکانی عێراق بە دواکەوتنی ئاسایی بوونەوەی پەیوەندییەکانی نێوان ھەرێم و بەغدا گوتی: "ئەو کێشانە لە ماوەی چەند ساڵی رابردووەوە ھەیە، مەگەر حکوومەتێکی تازە دروست ببێت و ئەو حکوومەتە چارەسەری ئەو ناکۆکییانە بکات، چونکە ئەو ناکۆکیانە وەک خۆی ماوە و بابەتەکانی نەوت و فڕۆکەخانە و سنوورەکان لە ٢٠١٣ ەوە ناکۆکیان لەسەرە، ئەگەر ئیرادەی سیاسی نەبێت لەو باوەڕەدا نیم ھەڵبژاردن بتوانێت چارەسەری بکات".

ئارام محەمەد ھەروەھا گوتی: "حکوومەتی ناوەندی باس لەو بڕە نەوتە دەکات کە ئێستا لە کێڵگە نەوتییەکانی ژێر دەسەڵاتی حکوومەتی ھەرێم ھەیە، ناردنی بوودجە و مووچەشی پەیوەست کردووە بە ناردنی بڕی نەوتی ئەو کێڵگانەوە".

ئەو ئاماژەی بەوەش کرد، "سبەی لە سەرۆکایەتی پەرلەمانی عێراق کۆبونەوەیەکی تایبەتیان ھەیە بۆ گفتوگۆکردن لەگەڵ سەرۆکی فراکسیۆنەکان و لیژنە پەیوەندیدارەکان لەسەر وادەی ھەڵبژاردنی پەرلەمانی عێراق کە رۆژی ١٢ی ئایاری داھاتووی دیاری کردووە، چونکە بەپێی یاسا پێویستی بە پەسەندکردنی ئەو وادەیە ھەیە لەلایەن پەرلەمانەوە".

بە گوتەی ئەو ئەگەر یاسای نوێی ھەڵبژاردنەکان کە ئێستا لە پەرلەمانی عێراقە پەسەند نەکرێت، ئەوکات کار بە یاسای کۆنی ھەڵبژاردنەکان دەکرێت.