خۆپیشاندەران رێگای کەرکووک-ھەولێریان داخست

کەرکووک – AA

ئەمڕۆ دووشەممە، ژمارەیەک لە لایەنگرانی حەشدی شەعبی و پارتە تورکمانییەکان لەبەردەم بارەگای ئۆپەراسیۆنە ھاوبەشەکانی کەرکووک خۆپشاندانیان دژبە گەڕانەوەی پارتی دیموکراتی کوردستان ئەنجامدا و رێگای سەرەکی کەرکووک-ھەولێریان داخست.

دواتر خۆپشاندەران، خیوەتیان لەبەردەم بارەگای ئۆپەراسێونە ھاوبەشەکان ھەڵدا و مانگرتنیان راگەیاند.

ئەبو محەمەد عەززاوی یەکێک لە بەشداربووانی خۆپشاندانەکەی ئەمڕۆی بەردەم بارەگای ئۆپەراسیۆنە ھاوبەشەکان بۆ ئاژانسی ئانادۆڵو گوتی: "ئێمە دژی گەڕانەوەی پارتی دیموکراتی کوردستانین و قبوڵ ناکەین بەھیچ شێوەیەک پارتی بگەڕیێتەوە و کەرکووکیش بگەڕێتەوە دۆخی پێش رووداوەکانی ئۆکتۆبەری ٢٠١٧".

ئەبو محەمەد عەززاوی گوتیشی: "نامانەوێت کەرکووک بگەڕێتەوە خراپی دۆخی ئەمنی و سیاسیی، چونکە ئەوکات ھاووڵاتییانی عەرەب و تورکمان قورسی و ستەمی زۆریان بینی و ھەرگیز ئەو دۆخەمان ناوێتەوە".