عێراق.. چەکدارانی داعش لە دیالە پێنج هاووڵاتییان کوشت

بەغدا - AA

پێنج هاووڵاتیی سڤیل لەلایەن چەکدارانی رێکخراوی تیرۆریستی داعش لە پارێزگای دیالە رۆژهەڵاتی عێراق، کوژران.

ئەفسەر لە پۆلیسی دیالە، شەعلان کاملی لە لێدوانێکدا بۆ ئاژانسی ئانادۆڵو گوتی: "چەکدارانی داعش گاوانێکیان لە قەزای میقدادییە باکووری رۆژهەڵاتی شاری بەعقوبە ناوەندی پارێزگای دیالە کوشت و دواتر تەرمەکەیان بۆمبڕێژ کردووە".

شەعلان کاملی گوتیشی: "تەرمە بۆمبڕێژکراوە بە کەسوکاری گاوانەکەدا تەقیوەتەوە لەوکاتەی کە ویستوویانە تەرمەکە هەڵبگرنەوە و بەهۆیەوە چوار کەسی دیکە کوژراون".

ئەو ئەفسەرەی پۆلیس ئاماژەی بەوەشکرد کە هێزە ئەمنییەکان هەڵمەتی گەڕان و پشکنینیان لە ناوچەکە دەستپێکردووە بۆ دۆزینەوەی چەکدارانی داعش.

لەسەرەتای ئەمساڵەوە هێرشی تیرۆریستانی داعش بەتایبەت لە ناوچەکانی سنووری پارێزگاکانی کەرکووک، سەڵاحەددین، دیالە زیادی کردووە.