هەڵەبجە - AA
بە بەشداری سەرکۆماری عێراق و کەسوکاری قوربانییانی کارەساتەکە، یادی ٣٥ ساڵەی کیمیابارانی هەڵەبجە کرایەوە.
مەراسیمەکە کاتژمێر ١٠:٠٠ دەستی پێ کرد و خەڵکی شارەکە، کەسوکاری قوربانییانی کارەساتەکە، بەرپرسانی حکوومەتی هەرێمی کوردستان، نوێنەر و کۆنسولی وڵاتان و سەرکۆماری عێراق بەشداربوون لە مەراسیمەکەدا و تاجەگوڵینەیان لەسەر مەزاری شەهیدان دانا.
سەرکۆماری عێراق، لەتیف رەشید بەشداری ساڵیادی کیمیابارانکردنی هەڵەبجە کرد و تاجەگوڵینەی رێزو وەفای لەسەر مۆنۆمێنتی هەڵەبجە دانا و لە وتەیەکیشدا رایگەیاند "دڵخۆشم بەبڕیارەکەی ئەنجوومەنی وەزیرانی عێراق لەبارەی بەپارێزگا بوونی هەڵەبجەوە، هەڵەبجەییەکان شایەنی خزمەتی زیاترن، چونکە هەڵەبجە بوو خەبات و قوربانیدانی گەلی کوردی بەجیهان ناساند".
گوتیشی: "کارەساتی هەڵەبجە هەستی هەموو جیهانی هەژاند و هەڵەبجە شاری قوربانیدانی هەموو جیهانە، دەبێت هەموومان رێگربین تا کارەساتێکی لەو شێوەیە هەرگیز دووبارە نەبێتەوە".
لە بەشێکی تری قسەکانیدا سەرکۆماری عێڕاق گوتی: "پێویستە هەڵەبجە بکرێتە نموونەی شاری قوربانیدان نەک لە کوردستان بەڵکو لە هەموو جیهان، جێی خۆیەتی دەستخۆشی لە ئەنجوومەنی وەزیرانی عێراق بکەم کە بڕیاریدا، هەڵەبجە ببێتە نۆزدەهەمین پارێزگای عێراق، بەم بۆنەیەشەوە پیرۆزبایی لە خەڵکی هەڵەبجە دەکەم، هەروەها هەوڵەکانمان بەردەوام دەبیت تا لە پەرلەمانی عێراقیش بڕیارەکەی ئەنجوومەنی وەزیران پەسەند بکرێت".
هەروەک ئاماژەی بەوە دا کە پارێزگاری هەڵەبجە رادەسپێرێت، داواکاری و پێداویستییەکانی پارێزگاکەیان ئاراستە بکات و گوتی: "بۆئەوەی هەوڵەکانمان زیاتر بخەینەگەڕ و لە عێراقەوە داواکارییەکانیان بۆ جێبەجێ بکەین، چونکە هەڵەبجەییەکان خەبات و قوربانیدانی گەلی کوردی بەجیهان ناساند".
لە مەراسیمەکەدا هەریەک لە نوێنەر و کۆنسولی وڵاتان ئامادەبوون و تاجەگوڵینەیان دانا. هاووڵاتییانی شارەکانی هەرێم هاوشانی کەسوکاری قوربانییانی کیمیابارانی هەڵەبجە، پەیتا پەیتا دەهاتنە سەر مەزاری شەهیدان و تاجەگوڵینەیان دادەنا.
ناوبەناو هاووڵاتییان و بەرپرسان و نوێنەرانی وڵاتان بە جیا سەردانی مۆنۆمێنتی هەڵەبجەیان دەکرد بۆ ئەوەی لە نزیکەوە چیرۆکی کارەساتەکە بە چاوی خۆیان ببینن.
لە کاتژمێر١١ی پێشنیوەڕۆدا هەلیکۆپتەرێک گوڵاوی پرژان بەسەر شارەکەدا وەک ئاماژەیەک بۆ بڵاوکردنەوەی بۆنی گوڵ کە هێمای ئاشتییە لە بری بۆنی سێو کە گازە کیمیاییەکەی پێ بۆندار کرابوو لە کیمیابارانی هەڵەبجەدا.
کاتژمێر ١١ی پێشنیوەڕۆی رۆژی ١٦ی ئاداری ١٩٨٨، فڕۆکە جەنگییەکانی عێراق شاری ھەڵەبجەیان بە گازی کیمیایی بۆردومان کرد و بەھۆیەوە زیاتر لە پێنج ھەزار ھاووڵاتیی سڤیل شەھید و چەندین ھاووڵاتیی دیکەیش برینداربوون.
