Rewa Mahmood Hasan
20 ئادار 2020•نوێکردنەوە: 23 ئادار 2020
سلێمانی - AA
بەبۆنەی جەژنی نەورۆز و سەری ساڵی کوردییەوە، ئەمڕۆ بەبێ ئامادەبوونی هاووڵاتییانی شارەکە، پۆلیسی سلێمانی ئاگری نەورۆزی لەسەر هەردوو شاخی گۆیژە و بەرانان کردەوە.
دوای ئەوەی هەموو بۆنە و رێورهسمێكی ئایینی، کۆمەڵایەتیی و نەتەوەیی بەهۆی رێکارەکانی رێگرییكردن لە بڵاوبوونەوەی ڤایرۆسی کۆرۆنا لە هەرێمی کوردستان قەدەغە کرا، لەسەر فەرمانی پارێزگاری سلێمانی و لەلایەن بەڕێوەبەرایەتی پۆلیسی سلێمانییەوە ئاگری نەورۆز لەسەر هەردوو شاخی گۆیژە و بەرانان کرایەوە.
گوتەبێژی بەڕێوەبەرایەتی پۆلیسی سلێمانی، نەقیب سەرکەوت ئەحمەد لە لێدوانێکدا بۆ ئاژانسی ئانادۆڵو ئاماژەی بەوەدا کە بەهۆی ئەوەی ئاگری نەورۆز هێمایەکی نەتەوەییە، وەک بەڕێوەبەرایەتی پۆلیسی سلێمانی لەسەر فەرمانی پارێزگاری سلێمانی ههستاون بە کردنەوەی ئاگر لەسەر هەردوو شاخی گۆیژە و بەرانان، بەبێ ئەوەی رێگە بە قەرەباڵغی و گردبوونەوە بدرێت.
ئەوەی بەدیکرا نەورۆزی ئەمساڵ شەقامەکانی سالم و پیرەمێرد و گردی سەیوان چۆڵ بوون بەهۆی گرتنهبهری قەدەغەی هاتوچۆ، بەڵام هەندێک کەس بەتایبەت گەنجان، وەک نەریتی ساڵانە، بەپێ بەسەر بەرزاییەکانی گۆیژەدا سەرکەوتبوون، بۆ بەسەربردنی کاتێکی خۆش و هەڵمژینی هەوای پاک جگە لەوەی وەک وەرزشێک ئەم کارەیان کردبوو.
ناوبەناو لە سەر شاخی گۆیژەش چەندین کەسی بەتەمەن دەبینران کە بە تورەکەیەوە سەرقاڵی گیا کردن بوون لەوانە کنگر، کە ئێستا وەرزی رنینێتی.
شەقامی سالمیش هاوشێوەی شوێنەکانی تر، چۆڵیی پێوە دیاربوو، ناوبەناو دەورییەی ئاسایش و پۆلیس بەناو شەقامەکەدا دەگەڕان و لەرێی بڵندگۆوە ئاگاداری هاووڵاتییانیان دەکردەوە کە بچنەوە ماڵەکانیان لەبەر سەلامەتی گیانی خۆیان پەیڕەوی رێنماییە تەندروستییەکان بکەن.
لەبەردەم چەند ماڵێکدا بەبێ دروستکردنی قەرەباڵغی دایکان و باوکان جلوبەرگی کوردییان كردبوویه بهری منداڵەکانیان، و هاتبوونە دەرەوە بۆ نزیک باخ و پارکەکان تاکو منداڵەکانیان بێبەش نەکەن لە یادکردنەوەی نەورۆز کە بەهۆی رێکارە خۆپارێزییهكان لە ڤایرۆسی کۆرۆنا رێگە بە یادکردنەوەی نەدرا.
