سلێمانی-AA
بەڕێوەبەرایەتی گشتی کاروباری مین لە پارێزگای سلێمانی، پێشانگایەکی دۆکیومێنتاری بۆ مین لابەر، جەلیل فاتیح ئەحمەد کردەوە.
پێشناگاکە لە گەلەری مۆزەخانەی نیشتمانی ئەمنە سوورەکە لەژێرناوی''سەمای مەرگ لەگەڵ مینەکان'' کرایەوە کە تیایدا چەندین نموونەی مین و تەقەمەنی هاوشێوەکانی نمایش دەکرێت.
لە لێدوانێکدا بۆ ئاژانسی ئانادۆڵو، جەلیل فاتیح ئەحمەد ئاماژەی بەوەدا کە لە پێشانگاکەدا چەندین کار نمایش دەکات، تێیدا باس لە ئازاری مین دەکات.
جەلیل فاتیح کە تەمەنی ٤٠ ساڵە و زیاتر لە ٢٠ ساڵە لە بواری هەڵگرتنەوەی میندا کار دەکات، باس لەوە دەکات کە لەئێستادا هەڵگرتنەوەی مین لە هەرێمی کوردستان زۆر بەرەوپێشچووە، بەجۆرێک کە ئەوانەی ئەزموونیان هەیە لە بوارەکەدا دەچنە وڵاتانی دیکە و وەک راهێنەر بەشداری لە خولەکان دەکەن.
جەلیل فاتیح کە نیوەی تەمەنی خۆی داوە بە بواری هەڵگرتنەوەی مین باس لەوە دەکات کە ژمارەیەکی زۆری مین لە هەرێمی کوردستاندا ماون بۆیە دەبێت بەردەوام بن لە چالاکی بۆ پاککردنەوەی ناوچەکە لەو مینانە.
