Abdula Berisha
09 Јануари 2025•Ажурирај: 10 Јануари 2025
СКОПЈЕ (АА) - Косовските власти испратија писмо до командантот на КФОР, Енрико Бардуани, во кое се појаснува дека Косовските безбедносни сили (КБС) нема да се ангажираат на северот на земјата без да добијат овластување од мисијата на НАТО во земјата, пренесува Анадолу.
Како што објавија локалните медиуми, министерот за одбрана на Република Косово, Ејуп Маќедонци, изјавил дека земјата ќе продолжи да ја почитува заложбата од 2013 година изразена од тогашниот премиер на Косово кон тогашниот шеф на НАТО.
Сепак, Маќедонци истакнал дека испратеното писмо не треба да се сфати како повторување на истата заложба бидејќи таа била направена на повисоко ниво, туку како објаснување.
„Значи, не станува збор за повторување на заложбата, затоа што заложбата од 2013 година е преземена на ниво на премиер и генерален секретар на НАТО“, беше цитиран Маќедонци, кој додава:
„Целта на писмото беше да му се објасни на командантот на КФОР дека ангажманот на единицата на КБС во една од четирите општини на северот на Косово, што се случи неколку дена пред испраќањето на писмото, нема намера да предизвика тензии.“
