Сирискиот министер за енергетика објави инвестиција од 7 милијарди долари од која дел се и турски компании

ДАМАСК (АА) - Енергетски договор вреден 7 милијарди долари, потпишан од страна на турски, катарски и американски компании, значително ќе го зголеми снабдувањето со електрична енергија во Сирија и ќе ги подобри условите за живот на милиони луѓе, изјави за Анадолу сирискиот министер за енергетика, Мухамед ал-Башир.

Соработката вклучува изградба на четири електрани на природен гас и една соларна централа, а во договорот учествуваат турските компании „Калјон холдинг“ и „Џенгиз холдинг“, катарската компанија УЦЦ, американската „Пауер интернешнал“ и сириското Министерство за енергетика.

Договорот е опишан како еден од најсеопфатните и најзначајните во енергетскиот сектор на Сирија досега, а се очекува да ја подобри услугата, да создаде работни места и да го поддржи економското и социјалното закрепнување на земјата по долгогодишната војна.

„Дамаск се надева дека ќе го зголеми вкупниот капацитет за производство на енергија на 5.000 мегавати“, рече тој.

Ал-Башир нагласи дека санкциите претходно ги одвраќале инвеститорите, но сега, кога тие се укинати, компаниите можат „похрабро да вложуваат“.

„Оваа инвестиција испраќа силна порака на доверба до светот“, додаде тој.

- Отворен повик за сите сектори -

Ал-Башир посочи дека Сирија нуди бројни можности за инвестиции и дека земјата е сега „подготвена“, при што „компаниите веќе се во редица“.

Како пример го наведе и договорот за енергетска соработка меѓу Турција и Јордан, кој вклучува изградба на нова електрична линија со напон од 400 киловолти.

„Очекуваме значително зголемување на снабдувањето и потрошувачката во првите месеци од следната година“, рече тој.

„Во моментов, сириските домаќинства добиваат само околу 1.500 мегавати, со просечно снабдување со струја од три до четири часа дневно“, објасни министерот.

Тој додаде дека овие инвестиции и договори ќе донесат конкретни подобрувања во секојдневието на граѓаните.

„Овој договор е отворен повик до сите сектори – можностите во Сирија се огромни, и ние сме подготвени за инвестиции“, истакна Ал-Башир.