Во Австралија започна најголемиот и најпознат саем на авијација

МЕЛБУРН (АА) - Со акробациите на воените авиони и хеликоптери денес започна Меѓународниот саем на авијација и одбрана во Австралија „Avalon Airshow“, јавува Anadolu Agency (AA).

Се работи за еден од најважните саеми на авијација, кој привлекува повеќе десетици илјади посетители.

Саемот во австралискиот град Џилонг, кој се одржува на секои две години, започна денес и ќе трае во наредните три дена. Учествуваат земји и фирми кои се водечки во областа на авијацијата.

Во затворениот дел на саемот што го посетуваат десетици илјади луѓе, водечките компании во авиоиндустријата ги промовираат прототипите и новите технологии. Се работи за претставување на беспилотни летала, ракетни фрлачи. хеликоптерски мотори, борбени авиони, вселенски технологии, како и радарски системи за дронови.

Во отворениот дел на саемот се изложени сите елементи, од патнички до борбени авиони и хеликоптери, потоа од огромни транспортни авиони до оклопни воени возила, и од акробатски авиони до цивилни хеликоптери.

Во рамките на саемот, австралиските, новозеландските, сингапурските и американските борбени авиони и хеликоптери, како и огромните транспортни авиони, ги покажаа своите способности. Имено, посетителите имаа можност да го видат перформансот на борбените авиони од типот „F/A -18F Super Hornet“, „C-17 Globemaster“, „F-35A“ и „F-22A Raptor“.