Serdar Dincel
15 Јуни 2024•Ажурирај: 17 Јуни 2024
ИСТАНБУЛ (АА) - Претседателот на Туркије, Реџеп Таип Ердоган, вчера се состана со претседателот на Бразил, Луиз Инасио Лула да Силва, на маргините на Самитот на Г7, известува Анадолу.
Дирекцијата за комуникации на турското претседателство соопшти дека двајцата лидери разговарале за односите меѓу Туркије и Бразил, за израелските злосторства во Газа и што во моментов треба да се стори за да се запрат злосторствата во палестинската енклава.
Посочувајќи дека Тел Авив во последно време станал сѐ поизолиран, Ердоган истакнал дека притисокот врз Израел мора да биде засилен и постојан за да се стави крај на угнетувањето.
Самитот на лидерите на Г7 се одржува во Борго Егнација (Фасано) во Апулија, од 13 до 15 јуни.
Повеќе од 37.300 Палестинци се убиени во израелската брутална воена офанзива врз Појасот Газа со неселективно бомбардирање на цивилни населби, училишта, верски објекти и болници од 7. октомври минатата година, соопшти вчера Министерството за зддравство на опколената палестинска енклава.
Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од милион раселени Палестинци побараа засолниште.
На 10 јуни Советот за безбедност на Обединетите нации (СБОН) усвои резолуцијата за прекин на огнот во Газа, со која се бара поддршка за предлогот објавен од американскиот претседател Џо Бајден составен од три фази и предвидува итен прекин на огнот во Газа.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
