„Епл“ тужи израелски производител на шпионски софтвер поради нападите на ајфони

ВАШИНГТОН (АА) - „Епл“ денеска објави дека го тужи озлогласениот израелски производител на шпионски софтвер, групацијата НСО, поради наводното „флагрантно кршење“ на американскиот закон што произлегува од напорите да ги таргетира корисниците на ајфони, јавува Агенција Анадолија (АА).

„Епл“ соопшти дека бара трајна забрана за спречување на групацијата НСО повторно да користи некој од нејзините уреди, софтвер или услуги, откако шпионскиот софтвер на израелската фирма „Пегасус“ беше користен за следење и таргетирање на корисниците на „Епл“.

„Актери спонзорирани од државата како групацијата НСО трошат милиони долари на софистицирани технологии за надзор без ефективна одговорност. Тоа треба да се промени“, изјави Крег Федериги, потпретседател за софтверско инженерство на „Епл“.

„Уредите на „Епл“ се најбезбедниот хардвер за потрошувачи на пазарот - но приватните компании кои развиваат шпионски софтвер спонзориран од државата, станаа уште поопасни. Додека овие закани за сајбербезбедноста влијаат само на многу мал број наши клиенти, ние го сфаќаме секој напад врз нашите корисници многу сериозно и постојано работиме на зајакнување на заштитата на безбедноста и приватноста во ајОС“, додаде тој.

Правната жалба на „Епл“ тврди дека групацијата НСО имплементирала експлоит, познат како „FORCEDENTRY“ во својот софтвер за шпионирање што им дозволува на корисниците да се инфилтрираат во уредите на „Епл“ и да инсталираат софтвер „Пегасус“.

„Епл“ соопшти дека ќе донира 10 милиони долари, како и неодредениот износ на отштета што ја бара на суд, на организации кои се специјализирани за борба против шпионските софтвери.

Рон Дејберт, директорот на Граѓанската лабораторија на Универзитетот во Торонто, ја поздрави правната постапка на „Епл“, велејќи дека тоа е чекор кон сметање на групацијата НСО „одговорна за нејзините злоупотреби“ и изразувајќи надеж дека тоа „ќе помогне да се донесе правда за сите кои биле жртва на непромисленото однесување на групацијата НСО.“

„Платеничките фирми за шпионски софтвер како групацијата НСО направија некои од најлошите светски прекршувања на човековите права и акти на транснационална репресија, истовремено збогатувајќи се себеси и нивните инвеститори“, рече тој.

НСО тврдеше дека го продава својот шпионски софтвер на владите само за законски цели, но постојано беше откривано дека е во центарот на контроверзноста, вклучително и напорите да се надгледуваат новинарите, дисидентите и шефовите на држави.

САД ја санкционираа компанијата на 3 октомври, откако утврдија дека НСО и израелската компанија за надзор, „Кандиру“, „развиле и доставувале шпионски софтвер за странски влади кои ја користеле оваа алатка за злонамерно да имаат на нишан владини службеници, новинари, бизнисмени, активисти, универзитетски професори и вработени во амбасадите“.