Во Демократска Република Конго се одржаа протести против движењето „23 март“ и против Руанда

ЈАУНДЕ (АА) - Големи протести против бунтовничката група Движење „23 март“ (М23) и против Руанда се одржаа во Киншаса, главниот град на Демократска Република Конго (ДРК).

Демонстрантите се собраа на различни локации во Киншаса за да ја осудат опсадата на градот Гома од страна на М23 и наводната поддршка на Руанда за бунтовниците.

Извикувајќи слогани како „Не за М23, крај на интервенцијата на Руанда“ и „Почитувајте го нашиот суверенитет“, демонстрантите ја повикаа Владата да ја обезбеди националната безбедност и да го заштити територијалниот интегритет на земјата.

Демонстрантите запалија некои делови од француската Амбасада во Киншаса.

Додека безбедносните сили преземаат интензивни мерки за осигурување на безбедноста за време на протестите, демонстрациите продолжуваат во многу делови на главниот град.

- Судири во ДР Конго

Повеќе од 400.000 луѓе се раселени од почетокот на годината поради тековните насилни судири меѓу М23 и безбедносните сили на истокот на ДР Конго.

Откако ја презеде контролата врз многу села и градови во регионот, М23 неодамна го опколи и Гома, главниот град на провинцијата Северен Киву, со популација од околу 1 милион, правејќи ги неупотребливи градските системи за електрична енергија и вода.

Обединетите нации и Демократска Република Конго ја обвинуваат Руанда за поддршка на М23, а Руанда ги негира тврдењата.

Нападите на М23 доведоа до дипломатски тензии меѓу ДР Конго и Руанда. На 26 јануари Демократска Република Конго ги отповика сите свои дипломати од Руанда и целосно се прекинати односите меѓу двете земји.

М23, познато и како Револуционерна армија на Конго, е создадено по пропаѓањето на мировниот договор потпишан на 23 март 2009 година, и го сочинуваат членови на племето Тутси, на кое му припаѓа и претседателот на Руанда, Пол Кагаме.