Во Ирак фатен бомбаш на терористичката организација ДЕАШ

БАГДАД

Во акција на Ирачката разузнавачка служба извршена во Багдад, фатен е бомбаш на терористичката организација ДЕАШ, јавува Агенција Анадолија (АА).

Во соопштението на Ирачката разузнавачка служба се наведува дека во акцијата организирана во подрачјето Абу Гариб е фатен бомбаш на ДЕАШ под кодното име „Тигар на Багдад“.

Бомбашот на ДЕАШ наводно бил задолжен за т.н. јужен регион, а се поврзува со многу терористички активности во Ирак.

Ирак во 2017 година прогласи победа над терористичката организација ДЕАШ, со враќање под контрола на целокупната своја територија. Околу третина од вкупната површина на Ирак од 2014 година беше окупирана од терористите на ДЕАШ.

Сепак, терористите на ДЕАШ повремено ги активираат пасивните ќелии и извршуваат напади. Исто така, ирачката војска продолжува да извршува антитерористички операции.