Забележани се 34 кинески авиони и 9 брода во околината на Тајван

ПЕКИНГ (АА) - Во соопштението на тајванското Министерство за одбрана се наведува дека покрај два Су-30, два Џ-11, четири Џ-10 и шест Џ-16 борбени авиони, забележани се и еден Ј-8 ЕВ за поморски транспорт, еден Ј-8 АСВ за поморска патрола и два авиони за електронско разузнавање, Ј-8 ЕЛИНТ, како и воени беспилотни летала од типот БКЗ-005 и БКЗ-007 кои ги преминале воздушните и морските линии за кои се претпоставува дека ги ограничуваат областите на влијание на страните во Тајванскиот Теснец и летале над областа што Тајван ја прогласи за Зона за идентификација на воздушната одбрана.

Во соопштението се наведува дека 34 воени авиони и 9 брода забележани во околината на островот биле следени со електронски системи за надзор, патролни авиони, бродови и копнени ракетни системи.

Летовите уследиле откако новоизбраниот претседател на Чешката Република, Петр Павел, телефонски разговараше со тајванската претседателка Цаи Инг-Вен. Пекинг протестираше поради одржаниот состанок, со образложение дека тоа претставува „мешање во внатрешните работи на Кина“, „го прекршува принципот на единствена Кина“ и „им дава погрешен сигнал на сепаратистичките сили кои го застапуваат ставот за независен Тајван“.

По посетата на Ненси Пелоси, претседателката на Претставничкиот дом на САД, во август 2022 година, Кина почна редовно да спроведува воени патролни активности околу Тајван и летови кои ја преминуваат номиналната „средна линија“, која го дели Тајванскиот Теснец.

Сметајќи го островот како дел од својата територија, Пекинг го нагласува „принципот на единствена Кина“ и се противи на воспоставувањето независни дипломатски односи на Тајван со земјите од светот, негово претставување во Обединетите нации и другите меѓународни организации, при што условува земјите признаени од Кина да ги прекинат дипломатските односи со Тајван.